Goa-Ayodhya Padyatra: प्रभू श्री राम यांची जन्मभूमी असलेल्या अयोध्येत भव्य राम मंदिर साकारले जात आहे. आगामी वर्षात म्हणजेच सन 2024 च्या जानेवारी महिन्यात या मंदिराची प्रतिष्ठापणा आणि लोकार्पण होणार आहे. त्या पार्श्वभुमीवर गोवा ते अयोध्या अशी पदयात्रा काढण्यात येणार आहे.

या पदयात्रेतून गोव्यातून थेट अयोध्येला जाऊन श्रीराम मंदिर आणि रामलल्लाचे दर्शन घेण्याची योजना आहे. त्यासाठी गोव्यातील साईभक्त परिवाराने या पदयात्रेचे आयोजन केले आहे. यापुर्वी साईभक्त परिवाराने गोवा ते शिर्डी पदयात्रेचे तब्बल दहा वर्षे यशस्वी आयोजन केले आहे.

या पायी वारीची सुरवात 3 जानेवारी रोजी सकाळी होणार आहे. एकूण 54 दिवसांची ही पदयात्रा असणार आहे. गोव्यातील श्रीरामभक्त या पदयात्रेत सहभागी होऊ शकतात. ज्यांना यात सहभागी व्हायचे आहे त्यांनी संस्थेचे अध्यक्ष प्रशांत वेर्लेकर यांच्याशी संपर्क साधावा.

3 जानेवारी रोजी सकाळी 9 वाजता म्हापसा येथे मुख्यमंत्री डॉ. प्रमोद सावंत यांच्या उपस्थितीत महाआरती होईल आणि त्यानंतर या पदयात्रेस प्रारंभ होईल. गोव्यातून शिर्डी, शेगाव, बागेश्वरधाम असा प्रवास करत 54 दिवसांनी 25 फेब्रुवारी रोजी ही पदयात्रा अयोध्येत पोहचेल.