पणजी: सभापती गणेश गावकर यांनी बुधवारी नवी दिल्लीत पंतप्रधान नरेंद्र मोदी यांची भेट घेत, गोवा विधानसभेत अनुसूचित जमातीला (एसटी) आरक्षण मिळवून देण्‍याच्‍या केंद्र सरकारच्‍या निर्णयाबद्दल त्यांचे आभार मानले.

विधानसभेत ‘एसटी’ समुदायासाठी राजकीय आरक्षण मिळावे, यासाठी राज्य सरकारकडून वारंवार प्रयत्‍न सुरू होते. त्‍याबाबत मुख्‍यमंत्री डॉ. प्रमोद सावंत यांनी अनेकदा केंद्रीय गृहमंत्री अमित शहा यांची भेट घेतलेली होती. अखेर, केंद्र सरकारने गोव्‍याची ही मागणी मान्‍य करून त्‍याबाबतची अधिसूचनाही जारी केली.

या आरक्षणाचा राज्‍यातील ‘एसटी’ समुदायाला भविष्‍यात मोठा फायदा मिळणार असल्‍याचे सांगत, या निर्णयाबाबत सभापती गावकर यांनी पंतप्रधान मोदींचे आभार मानले. याशिवाय गोवा विधानसभेच्या कामकाजाशी संबंधित घडामोडींची माहितीही त्‍यांनी मोदींना दिली.

रौप्‍यमहोत्‍सवाची दिली माहिती

गोवा विधानसभेच्या सध्याच्या इमारतीला २५ वर्षे पूर्ण होत असल्यानिमित्त आयोजित करण्यात येणाऱ्या कार्यक्रमांची माहिती सभापती गावकर यांनी पंतप्रधान नरेंद्र मोदी यांना दिली. शिवाय हा सोहळा अविस्मरणीय करण्यासाठी सहकार्य करण्‍याची विनंतीही त्‍यांनी केली.