पणजी, विधानसभेत चर्चेला येणाऱ्या दोनपैकी एक लक्षवेधी सूचना विरोधी आमदारांची असावी, या मागणीसाठी विरोधी आमदारांनी आज सभापतींसमोरील हौद्यात धाव घेतली.

ही मागणी त्‍यांनी लावून धरल्‍याने सभागृहाच्या कामकाजात व्यत्यय आला. यामुळे एक लक्षवेधी सूचना मुरगावचे आमदार संकल्प आमोणकर यांनी मांडल्यानंतर जेवणाच्या सुट्टीसाठी सभापती रमेश तवडकर यांनी १५ मिनिटे अगोदरच कामकाज तहकूब केले.

गेल्या आठवड्यात विरोधी पक्षनेते युरी आलेमाव यांनी हा मुद्दा उपस्थित केला होता. त्यावेळीही चर्चेला येणाऱ्या दोन्ही लक्षवेधी सूचना या सत्ताधारी आमदारांच्या होत्या. आलेमाव यांनी विधानसभा कामकाज सल्लागार समितीच्या बैठकीत विरोधी पक्षाच्या आमदारांची एक लक्षवेधी सूचना चर्चेला घ्यावी, अशी चर्चा झाली होती याकडे लक्ष वेधले होते. त्यावेळी सभापतींनी विधिमंडळ सचिव नम्रता उल्मन यांनी याची दखल घ्यावी, अशी सूचना केली होती.

विधानसभेच्या आजच्या कामकाज सूचीवर मुरगावचे आमदार संकल्प आमोणकर व सांताक्रुझचे आमदार रुडॉल्फ फर्नांडिस यांच्या लक्षवेधी सूचनांवर चर्चा होणार असल्याचे नमूद केले होते. शून्य तास संपून सभापतींनी लक्षवेधी सूचना पुकारल्यावर युरी आलेमाव उठले. ते म्हणाले, महत्त्वाचे विषय मांडू दिले जात नाहीत. शिवाय आज चर्चेला येणाऱ्या दोन्ही लक्षवेधी सूचना या सत्ताधारी आमदारांच्या आहेत. विरोधकांचा आवाज क्षीण करण्याचा हा प्रयत्न आहे.

त्यावर सभापतींनी ८ ऑगस्टपर्यंत कामकाज चालणार आहे, लक्षवेधी सूचना नंतर चर्चेला घेता येतील, असे सांगण्याचा प्रयत्न केला. सत्ताधारी गोटातून गेल्या आठवड्यात दोन दिवस केवळ विरोधी आमदारांच्या दोन-दोन लक्षवेधी सूचनांवर चर्चा झाली होती.

याकडे आलेमाव यांचे लक्ष वेधण्याचा प्रयत्न झाला. त्यानंतर आलेमाव यांनी सत्ताधारी आमदारांनी लक्षवेधी सूचना मांडल्या नसल्याने तसे झाल्याचे नमूद केले. ते म्हणाले, जनतेचे महत्त्वाचे विषय लक्षवेधी सूचनेद्वारे उपस्थित केले जातात. ती संधी नाकारली जाऊ नये. याचदरम्यान आमोणकर यांनी आपली लक्षवेधी सूचना मांडणे सुरू केले.

अन्‌ विरोधी आमदारांनी जागा सोडली!

सभापती कामकाज पुढे नेण्याचा प्रयत्न करत असल्याचे पाहून विरोधी पक्षांच्‍या आमदारांनी आपली जागा सोडली आणि ते सभापतींसमोरील हौद्यात आले. न्याय देण्याची आणि लक्षवेधी सूचना मांडण्यास परवानगी देण्याची मागणी ते करू लागले.

याचदरम्यान आमोणकर यांनी मांडलेल्या लक्षवेधी सूचनेवर ‘उद्या उत्तर देतो’ असे वीजमंत्री सुदिन ढवळीकर यांनी सांगितले. विरोधी आमदार हटण्याच्या मन:स्थितीत नसल्याचे पाहून सभापतींनी कामकाज जेवणाच्या सुट्टीसाठी तहकूब केले.

विरोधकांना महत्त्‍वाचे विषय मांडू दिले जात नाहीत. विद्याप्रबोधिनी प्राथमिक विद्यालयाच्या स्थलांतरामुळे विद्यार्थ्यांच्या आरोग्याला उद्‍भवणाऱ्या धोक्यांसंदर्भात शून्य तासाला विषय मागण्याची परवानगी मागितली होती. ती देण्‍यात आली नाही. विरोधकांचा आवाज क्षीण करण्याचा हा प्रयत्न आहे. - युरी आलेमाव, विरोधी पक्षनेते