गोवा विधानसभेच्या पावसाळी अधिवेशनाचा आजचा 13 वा दिवस आहे. गेल्या काही दिवसांपासून राज्यासह देशभरात नीट परीक्षेत झालेल्या घोटाळ्यावरुन विद्यार्थी आक्रमक आहेत. याच पाश्वभूमीवर आज (31 जुलै) आमदार व्हेन्झी व्हिएगस यांनी पुन्हा एकदा नीट परीक्षा रद्द करण्याची मागणी केली. आमदार व्हिएगस नीट परीक्षेत झालेल्या घोट्याळ्यावर सभागृहात बोलत होते. यादरम्यान त्यांनी नीट परीक्षा रद्द करण्याची मागणी सरकारकडे केली.

आमदार व्हिएगस म्हणाले की, नीट परीक्षेतील घोटाळ्यामुळे विद्यार्थ्यांचा या परीक्षेवरुन विश्वास उडाला आहे. सरकारने मेडिकल आणि इंजिनिअरच्या प्रवेशासाठी NEET परिक्षा रद्द करुन CET परिक्षेच्या आधारावर प्रवेश द्यावा.

दरम्यान, काही दिवसांपूर्वी नीट परीक्षेच्या निकालानंतर देशभरात गोंधळ बघायला मिळाला होता. विद्यार्थी मोठ्या संख्येने नीट परीक्षेच्या निकालाच्या विरोधात रस्त्यावर उतरल्याचे पाहायला मिळाले होते. यावेळी विद्यार्थ्यांनी परीक्षा रद्द करण्याची मागणी केली होती. परीक्षेचा निकाल लागल्यानंतर सातत्याने आरोप करण्यात आले. मोठा घोटाळा या परीक्षेत झाल्याचा आरोप करण्यात आला.

‘नीट’ परीक्षेच्या पेपरफुटीमुळे देशभरातील 25 लाख विद्यार्थ्यांना फटका बसला आहे. अनेकांना अटकही करण्यात आली. या परीक्षेत जे विद्यार्थी (Student) पेपरफुटीमुळे चांगल्या गुणांनी उत्तीर्ण झाले आहेत, ते जेव्हा डॉक्टर होतील त्यावेळी त्यांच्या पात्रतेवर शंका घेण्यात येईल. त्यामुळे ‘नीट’ परीक्षा पुन्हा नव्याने घेण्यात यावी, अशी मागणी ‘एनएसयूआय’चे राष्ट्रीय सचिव अरहज मुल्ला यांनी काही दिवसांपूर्वी केली होती.

पणजी येथील कॉंग्रेस भवनात आयोजित पत्रकार परिषदेत ते बोलत होते. यावेळी एनएसयूआय गोवाचे अध्यक्ष नौशाद चौधरी उपस्थित होते. दरम्यान अरहज मुल्ला म्हणाले होते की, जर पेपर फुटीमुळे डॉक्टर होणारे वैद्यकीय क्षेत्रात प्रवेश करतील, त्यावेळी देशाची आरोग्य सेवा धोक्यात येईल.