Goa: बऱ्याच दिवसांच्या प्रतीक्षेनंतर अस्नोडा पुलावरील (Asnorra Bridge) रस्ता अखेर 'खड्डे' मुक्त (Pits free Road) झाला आहे. या पुलावरील रस्त्याची अखेर सार्वजनिक बांधकाम खात्याने डागडुजी करताना पुलावरील रस्ता चकाचक केला आहे. त्यामुळे आता या पुलावरून वाहतूक करताना वाहनचालकांना खडड्यांशी स्पर्धा करावी लागत नाही, की अन्य कोणती समस्याही निर्माण होत नाही. यामुळे वाहनचालकांत समाधान व्यक्त होत आहे.

अस्नोडा पुलावरील रस्त्याची अत्यंत दयनीय अवस्था झाली होती. पारकडील बाजूने पुलाला जोडलेल्या रस्त्यावर तर मोठे खड्डे पडून हा रस्ता पूर्णपणे खिळखिळा बनला होता. त्यामुळे पुलावरून वाहतूक करताना वाहनचालकांना कठीण दिव्य पार करावे लागत असे. लहानसहान अपघात तसेच वाहनांच्या सुट्या भागांची मोडतोड होण्याचे प्रकारही वाढले होते. पुलावरील खड्डयांवरुन काँग्रेस कार्यकर्त्यांनी गेल्या 2 ऑक्टोबर रोजी अचानक आक्रमक पवित्रा घेत खड्डयांनी झोपून आगळ्यावेगळ्या पद्धतीने सरकारचा निषेध केला होता

'खड्डे' प्रकरण तापल्यानंतर हालचाली

पंधरा दिवसांपूर्वी राज्यात रस्त्यांवरील खडड्यांचा विषय तापल्यानंतर मुख्यमंत्री डॉ. प्रमोद सावंत यांनी गंभीर दखल घेताना राज्यातील रस्ते येत्या 1 नोव्हेंबरपर्यंत खड्डेमुक्त करण्याचे जाहीर केले आहे. त्यानुसार सध्या सार्वजनिक बांधकाम खात्यातर्फे डिचोलीतील विविध भागात खड्डे बुजविण्याचे काम हाती घेण्यात आले आहे. अस्नोडा प्रमाणेच साखळी पुलाजवळील रस्त्याचीही डागडुजी करण्यात आली आहे.