Aramboli Accident: वाघकोळंब-हरमल येथील ‘स्वीट लेक’जवळील समुद्रात बुडून जम्मू-काश्मीरच्या दोन पर्यटकांचा मृत्यू होण्याची घटना आज बुधवारी सकाळी घडली. हे दोघेही सख्खे भाऊ असून, अभिषेक (३४) व अमन (२८) अशी त्‍यांची नावे आहेत. अभिषेकचे लग्न ठरले होते. त्‍यानिमित्त पार्टी करण्‍यासाठी ते गोव्‍यात आले होते.

मिळालेल्‍या माहितीनुसार, जम्मू-काश्मीर आणि हिमाचल प्रदेशचे चार पर्यटक रविवारी गोव्यात सहलीसाठी आले होते. ते कळंगुटमध्ये बागा येथे उतरले होते.

अमन व अभिषेकबरोबर सुमित श्रीवास्तव (33) व रुहान गुजरा (28) हे होते. आज सकाळी साडेसहाच्‍या सुमारास वरील दोघे भाऊ हरमल समुद्रात आंघोळीसाठी उतरले.

दरम्‍यान, समुद्रात दोघेजण बुडाल्याची माहिती सकाळी 8 वाजून 40 मिनिटांनी पेडणे अग्निशामक दलाला मिळाली. त्यानुसार दलाच्‍या जवानांनी तात्‍काळ घटनास्‍थळी धाव घेतली.

2 तास शोधमोहीम

आज सकाळी साडेसहाच्‍या सुमारास अभिषेक व अमन हे दोघेही ‘स्वीट लेक’ तळ्याजवळ समुद्रात आंघोळीसाठी उतरले होते. परंतु पाण्‍याचा अंदाज न आल्‍याने ते बुडाले.

अग्निशामक दलाने तब्‍बल दोन तास मोहीम राबवून दोघांचे मृतदेह बाहेर काढले. दरम्‍यान, याच ठिकाणी काही वर्षांपूर्वी बेंगळुरुस्थित पर्यटकांचा बुडून मृत्यू झाला होता.