Goa Accident News: साखळी येथे धावत्या जीपगाडीवर आंब्यांचे झाड कोसळून एकजण जखमी झाल्याची घटना समोर आली आहे. तर जीपगाडीच्या चालकासह दोघेजण सुखरूप बचावले. ही घटना आज (गुरुवारी) सकाळी 11 वाजण्याच्या सुमारास साखळी-आमोणे रस्त्यावरील गावठण येथे घडली.

सार्वजनिक बांधकाम खात्याचे कर्मचारी असलेले बोर्डे येथील केशू पळ हे या अपघातात जखमी झाले. डिचोली अग्निशमन दलाच्या जवानांनी झाड बाजूला केल्यानंतर सुमारे तासाभराने या रस्त्यावरील खोळंबलेली वाहतूक सुरळीत झाली.

यासंबंधीची माहिती अशी की, जीए-04-टी-6389 या क्रमांकाची जीपगाडी बिल रिडींगसाठी कर्मचाऱ्यांना घेवून न्हावेली येथे जात होती. गावठण येथे जीपगाडी पोचताच रस्त्याच्या बाजूने असलेला एक भलेमोठे आंब्यांचे झाड जीपगाडीवर कोसळले.

या घटनेत जीपगाडीची मोडतोड होवून चालकासह तिघेजण आत अडकून पडले. पैकी केशू पळ याच्या डोक्याला जखम झाली. लागलीच 108 रुग्णवाहिकेला पाचारण करुन जखमी पळ याला उपचारार्थ साखळीच्या सामाजिक इस्पितळात नेण्यात आले.