गोव्यातील राष्ट्रीय महामार्ग क्रमांक 66 (NH-66) वर एक भीषण अपघात घडला. पणजीहून मडगावच्या दिशेने प्रवास करणाऱ्या एका कारचा अपघात झाला. या दुर्घटनेत चालकाचा जागीच मृत्यू झाला असून कारमधील अन्य दोन प्रवासी गंभीर जखमी झाले आहेत. अपघातानंतर काही क्षणांतच वाहनाला आग लागल्याने परिसरात एकच खळबळ उडाली.

प्राथमिक माहितीनुसार, कार भरधाव वेगाने प्रवास करत असताना होली क्रॉस श्राईनजवळ हा अपघात घडला. कारनेने प्रथम महामार्गावरील दुभाजकाला जोरदार धडक दिली. धडकेचा वेग इतका जबरदस्त होता की कार थेट खालील सर्व्हिस रोडवर जाऊन कोसळली. अपघातानंतर वाहनातून धूर निघू लागला आणि काही वेळातच कारने पेट घेतला.

अपघाताचे नेमकं कारण अद्याप स्पष्ट झालेलं नसलं तरी भरधाव वेग, वाहनावरील नियंत्रण सुटणे किंवा इतर तांत्रिक कारणांचा तपास सुरू असल्याची प्राथमिक माहिती समोर आली आहे.

या भीषण अपघातात कार चालकाचा मृत्यू झाला, तर कारमधील अन्य दोघेजण गंभीर जखमी झाले. जखमींना बाहेर काढले उपचारांसाठी गोवा वैद्यकीय महाविद्यालय (GMC), बांबोळी येथे दाखल करण्यात आले असून त्यांच्यावर उपचार सुरू आहेत.