Goa Accidental Death कुडचडे येथे शनिवारी रात्री झालेल्या अपघातात कट्टा-आमोणा येथील मनोज सुतार (32) या तरुणाचा जागीच मृत्यू झाला. कुडचडे येथील रस्त्यांवरील खड्डे चुकविताना ही दुर्घटना घडल्याचा आरोप स्थानिक लोकांनी केला आहे.

पोलिसांनी दिलेल्या माहितीनुसार, शनिवारी रात्री 12 वाजता कुडचडे रवींद्र भवनसमोर दोन दुचाकींमध्ये झालेल्या अपघातात कट्टा-आमोणा येथील मनोज सुतार या युवकाचा जागीच मृत्यू झाला, तर दुसऱ्या दुचाकीस्वारासह आणखी एकजण गंभीर जखमी झाला.

घटनेला सरकार जबाबदार!

शनिवारी जो अपघात झाला, त्याला रस्त्यावरील खड्डे जबाबदार असल्याचे स्थानिक लोकांनी सांगितले. कुडचडेतील रवींद्र भवनसमोरून सांगेकडे जाणाऱ्या रस्त्यावर भले मोठे खड्डे पडले असून हे खड्डे मोठमोठे दगड घालून बुजविले असले तरी रस्ता ओबडधोबड आहे. हे खड्डे चुकविण्याच्या नादात केपेकडे जाताना समोरून येणाऱ्या दुचाकीची टक्कर झाल्याने मनोजचा जागीच मृत्यू झाला.

किती बळी घेणार? : रस्त्यांवरील खड्डे बुजविण्याचे सोडून रस्ते खोदण्याचे काम सुरूच असल्याचे लोकांचे म्हणणे आहे. कंत्राटदाराला या रस्त्यांचे काहीच पडलेले नाही. कुडचडेत जीवाशी खेळ सुरू असल्याची तक्रार लोकांनी केली.

जखमीचा मृत्यू; चालकावर गुन्हा

म्हापसा : शिरसई येथील पेट्रोल पंपाजवळ सहा दिवसांपूर्वी झालेल्या अपघातातील जखमी संज्योत मांद्रेकर (वय २३, रा. शिरगाव) याचा उपचारादरम्यान गोमेकॉत मृत्यू झाला. कोलवाळ पोलिसांनी या अपघातास कारणीभूत ठरलेला कारचालक रॉयस्टन फोन्सेका (रा. माडेल-थिवी) याच्याविरोधात गुन्हा नोंद केला आहे.