पिसुर्ले: होंडा गावकरवाडा (Honda Gaonkarwada) येथे आज सायंकाळी एका दुधवाहू टेम्पो (Milk carrier) चालकांनी रस्त्यावर भटकणाऱ्या कुत्र्यांना वाचण्यासाठी लावलेल्या ब्रेक मुळे अपघातास सामोरे जावे लागले, यात कोणतीच जिवित हानी झाली नाही, मात्र या अपघातामुळे वाहनाचे तसेच दुधाचे नुकसान (Loss of milk) झाले आहे.

या संदर्भात मिळालेली माहिती अशी की आज सायंकाळच्या दरम्यान केरी सत्तरी भागातील दुध गोळा करून होंडा गावकरवाडा मार्गे सदर टेम्पो फोंडा येथील दुध डेअरी मध्ये जात होता, या वेळी होंडा गावकरवाडा येथे पोचताच रस्त्यावर भटकणारे कुत्रे आडवे आल्याने, सदर कुत्र्याला वाचविण्यासाठी अचानक ब्रेकचा वापर करावा लागल्याने सदर टेम्पो रस्त्याच्या बाजूला कलंडला, मात्र सुदैवाने यावेळी चालकाला कोणतीच दुखापत झाली नसल्याचे समजते. या अपघातामुळे वाहनाचे तसेच दुधाचे नुकसान झाले असून, या संबंधी होंडा पोलिस ठाण्यात अपघाताची कोणतीच नोंद झाली नसल्याची माहिती पोलीस सूत्रांनी दिली.

दरम्यान या अपघातावरून या भागात प्रचंड प्रमाणात वाढलेला भटक्या कुत्र्यांचा तसेच गुरांचा प्रश्न ऐरणीवर आला असून, अशा प्रकारे बऱ्याच वेळा भटकी कुत्री व गुरे यामुळे वाहन चालकांना अपघातास सामोरे जावे लागत आहे, या प्रकरणी संबंधित यंत्रणेने तातडीने लक्ष घालून त्यांना आवर घालावी अशी मागणी होंडा परीसरातील नागरिकांनी केली आहे.