पणजी : उच्च शिक्षण संचालनालयांतर्गत येणाऱ्या शासकीय आणि अनुदानित अशा ४० महाविद्यालयांत प्रथम वर्ष ऑनलाईन प्रवेश प्रक्रिया शुक्रवार, ११ एप्रिलपासून सकाळी ११ वाजता सुरू होणार असल्याची माहिती उच्च शिक्षण संचालनालयातील नोडल अधिकारी डॉ. महादेव गावस यांनी दिली.

यामध्ये बीए, बी.कॉम, बी.एससी, संगीत, थिएटर, गृहविज्ञान, व्होकेशनल, बीसीए, बीबीए, बीपी.एड, बीए.एलएलबी, बी.एससी कृषी, एएनडब्लू आणि जीएनएम, बी.एससी इन स्पोर्टस सायन्स, बी.एससी डाटा सायन्स या शाखांचा समावेश असून या शाखांसाठी उमेदवार अर्ज करू शकतात.

२५-२०२६ या शैक्षणिक वर्षाची सर्व शाखांची प्रवेश प्रक्रिया ‘ई समर्थ गव्हर्नन्स’ या संकेतस्थळाच्या माध्यमातून होणार आहे. प्रथम वर्षासाठी अर्ज करणाऱ्या उमेदवारांनी https://dhe.goa.gov.in/ या संकेतस्थळावरील माहिती काळजीपूर्वक वाचून अर्ज भरावेत, असे आवाहनही डॉ. गावस यांनी केले.

ज्या महाविद्यालयांमध्ये बीबीए आणि बीसीए अभ्यासक्रम सुरू झालेला आहे, ती महाविद्यालये विद्यार्थ्यांची ऑफलाईन प्रवेश परीक्षा घेतील. बीए.एलएलबीसाठीची प्रवेश परीक्षा गोवा विद्यापीठ घेईल, असेही डॉ. महादेव गावस यांनी सांगितले.

‘ई-समर्थ पोर्टल’वर नोंदणी

१ ऑनलाईन अर्ज करणाऱ्या विद्यार्थ्यांना एकाचवेळी पाच महाविद्यालयांना पसंती देता येईल. शिवाय एकाचवेळी पाच शाखांसाठी अर्ज करता येईल. अर्ज करणाऱ्या विद्यार्थ्याने ‘ई-समर्थ पोर्टल’वर एकदाच नोंदणी करावी.

प्रत्येक महाविद्यालय स्वतंत्रपणे गुणवत्ता यादी तयार करणार असून विद्यार्थ्यांनी जागा निश्चित झाल्यानंतर संबंधित महाविद्यालयात प्रवेश शुल्क भरावे. ऑनलाईन अर्ज भरताना विद्यार्थ्यांना कोणतीही समस्या आल्यास संबंधित महाविद्यालय आणि उच्च शिक्षण संचालनालयाच्या कार्यालयास भेट द्यावी.

३० एप्रिलपर्यंत प्रवेश प्रक्रिया

विद्यार्थी ऑनलाईन अर्ज ११ एप्रिल रोजी सकाळी ११ वाजल्यापासून करू शकतात. ऑनलाईन अर्ज सादर करण्याची शेवटची तारीख ३० एप्रिल २०२५ आहे. ऑनलाईन अर्ज मोफत असून त्यासाठी कोणतीही फी आकारली जात नाही. याशिवाय ई-माहिती पुस्तिका संबंधित महाविद्यालयाच्या संकेतस्थळावर उपलब्ध आहेत.