पणजी: गोवा वैद्यकीय महाविद्यालय व रुग्णालयात (गोमेकॉ) दहा दिवसांपूर्वी सर्व्हर बंद पडल्याने ओपीडी नोंदणी यंत्रणा विस्कळित झाली होती. ही समस्या अजूनही कायम असून रुग्ण आणि त्यांच्या नातेवाइकांना ताटकळत रांगेत उभे राहण्याची वेळ येत आहे. ऑनलाइन प्रणाली ठप्प झाल्याने रुग्णालय प्रशासनाकडून सुरू करण्यात आलेली मॅन्युअल नोंदणी प्रक्रिया अद्याप सुरूच आहे.

दररोज सुमारे १,५०० रुग्ण गोमेकॉच्या ओपीडीसाठी येत असतात. १७ जानेवारी रोजी सकाळपासूनच सर्व्हर बंद पडल्यामुळे रुग्णालय प्रशासनाला ऑफलाइन नोंदणी प्रक्रिया सुरू करावी लागली आहे. मात्र, दहा दिवस उलटूनही सर्व्हर समस्या सुटलेली नसल्याने रुग्ण आणि त्यांच्या नातेवाइकांना मोठ्या त्रासाला सामोरे जावे लागत आहे.

रुग्णांच्या नातेवाइकांमध्ये संताप

रुग्णालयातील नोंदणी काउंटरवर रांगा अजूनही पाहायला मिळत असून रुग्ण आणि त्यांचे नातेवाईक या स्थितीवर नाराजी व्यक्त करत आहेत. ताटकळत उभे राहणे कठीण होत आहे, विशेषतः वृद्ध आणि लहान मुलांना खूपच त्रास होत आहेत, असे एका रुग्णाच्या नातेवाईकाने सांगितले.

ऑफलाइन नोंदणी प्रक्रियेमुळे ओपीडी सेवा मोठ्या प्रमाणावर प्रभावित झाली असून अनेक रुग्ण वेळेवर डॉक्टरांकडे पोहोचू शकत नाहीत. तसेच बराच वेळ रांगेत उभे रहावे लागते. त्यामुळे गोमेकॉच्या व्यवस्थापनावर प्रश्नचिन्ह निर्माण होत आहे.

निदानाची गरज

सर्व्हर समस्या लवकरात लवकर सोडवून ऑनलाइन प्रक्रिया पूर्ववत करण्यासाठी प्रशासनाने तातडीने उपाययोजना करणे आवश्यक आहे. यामुळे रुग्णांना मिळणाऱ्या सेवांमध्ये सुधारणा होईल आणि नातेवाइकांना होणारा त्रास कमी होईल.

गोमेकॉत लवकरच नवी प्रणाली

या समस्येबाबत आरोग्यमंत्री विश्वजीत राणे यांनी यापूर्वीच स्पष्ट केले आहे की, सर्व्हर बंद पडणे हे कर्मचाऱ्यांच्या चुकांमुळे झालेले नाही. गोमेकॉमध्ये असा प्रकार यापूर्वी कधीही घडलेला नव्हता, असे सांगून त्यांनी कर्मचाऱ्यांचा बचाव केला. तसेच, गोमेकॉ लवकरच आरोग्य व्यवस्थापन माहिती प्रणाली लागू करणार आहे, ज्यामुळे रुग्ण व्यवस्थापन अधिक चांगले होईल, असे त्यांनी नमूद केले.