पणजी: म्हापसा येथील नियोजित रवींद्र भवनच्या उभारणीवरून काँग्रेस आणि भाजपमध्ये आरोप - प्रत्यारोपांच्या फैरी झडत आहेत. हळदोणे मतदारसंघाचे काँग्रेसचे विद्यमान आमदार काम करण्यास समर्थ आहेत. भाजपचे माजी आमदार ग्लेन टिकलो यांनी त्यांच्या मतदारसंघात ढवळाढवळ करू नये, अशी टीका काँग्रेसचे प्रसार माध्यम प्रमुख अमरनाथ पणजीकर यांनी ट्विटरवरून केली आहे.

भाजपचे माजी आमदार ग्लेन टिकलो यांनी म्हापसा येथे रवींद्र भवन उभे राहत नसेल तर ते हळदोणे मतदारसंघात उभारावे यासाठी मी प्रयत्न करणार. यासाठी सरकार पातळीवर प्रयत्न करू, असे विधान केले होते. यावरून काँग्रेसचे प्रवक्ते श्री. पणजीकर यांनी श्री. टिकलो यांच्यावर ट्विट करून निशाणा साधला.

तुम्ही हळदोणे मतदारसंघाचे दोनवेळा प्रतिनिधित्व केले. या काळात राज्यात तुमची म्हणजेच भाजपची सत्ता होती. मग त्या काळात तुम्ही रवींद्र भवन उभारणीसाठी का प्रयत्न केले नाहीत, असा सवालही श्री. पणजीकर यांनी श्री. टिकलो यांना केला. आमच्या पक्षाचे आमदार कार्लोस फेरेरा हळदोणेचे प्रतिनिधित्व करत आहेत. त्यांच्या कामात तुम्ही हस्तक्षेप करण्याची गरज नाही. यापेक्षा तुम्ही आराम करा, असा सल्लाही श्री. पणजीकर यांनी दिला.

बार्देश तालुक्यासाठीचे रवींद्र भवन म्हापसा येथे उभारणीचे काम विविध कारणांनी रखडले आहे. कधी जागेवरून तर कधी स्थानिकांच्या विरोधामुळे रवींद्र भवनचे काम अडले आहे.