पणजी: राज्याच्या मंत्रिमंडळ फेरबदलाबाबत गेल्या अनेक दिवसापासून चर्चा सुरु आहेत. काँग्रेस पक्षातून भाजपमध्ये पक्षांतर करुन आलेल्या आमदारांना मंत्रीपद दिलं जाणार असल्याची चर्चा आहे. यापैकी माजी मुख्यमंत्री दिगंबर कामत आणि आमदार मायकल लोबो यांच्या गळ्यात मंत्रीपदाची माळ पडण्याची शक्यता आहे. दरम्यान, मायकल लोबोंना मंत्रीपद देण्यात यावं, अशी मागणी आता साळगावचे आमदार केदार नाईक यांनी केली आहे.

मुख्यमंत्री प्रमोद सावंत यांनी गेल्या काही दिवसांपूर्वी दिगंबर कामत आणि मायकल लोबो यांच्याकडे मोठी जबाबदारी देण्याबाबत सूतोवाच केले होते. मंत्रीमंडळ फेरबदलच्या चर्चेत मुख्यमंत्री सावंत यांनी केलेल्या वक्तव्यामुळे दोघांकडे मंत्रीपद जाण्याची शक्यता वर्तवली जात होती. त्यानंतर आता साळगावचे आमदार केदार नाईक यांनी मायकल लोबो यांच्यासाठी मंत्रीपदाची मागणी केली आहे. लोबो यांना मंत्रीपद मिळाल्यास बार्देश तालुक्यातील रखडलेली कामे पूर्ण होतील, असा दावा त्यांनी केला आहे.

"मंत्रीमंडळ फेरबदलाचा निर्णय पक्ष आणि मुख्यमंत्री सावंत घेतील. मी जिथे आहे तिथे खुश आहे, हे मला स्पष्ट करायचेय की, पक्षात अनेक वरिष्ठ नेते आहेत. कळंगुटचे आमदार मायकल लोबो मंत्रीपदासाठी योग्य आहेत. लोबो यांना मंत्रीपद मिळाल्यास बार्देश तालुक्याची ताकद वाढेल आणि तालुक्यातील रखडलेली सर्व कामेही पूर्ण होतील", असे आमदार केदार नाईक म्हणाले.

मायकल लोबो यांना मंत्रीपद मिळाल्यास २०२७ च्या निवडणुकीत बार्देश तालुक्यातून आम्ही सर्वाधिक जागा निवडून आणू, असा दावा देखील केदार नाईक यांनी केला आहे. लोबो यांना मंत्रीपद देण्यात यावे अशी मी विनंती करतो, असे नाईक म्हणाले.

गोवा मंत्रीमंडळचा फेरबदल गेल्या वर्षापासून रखडला आहे. आधी लोकसाभा निवडणूक त्यानंतर महाराष्ट्र विधानसभेची निवडणूक यामुळे फेरबदलाचा निर्णय लाबंणीवर पडत गेला. नव्या वर्षात पुन्हा या चर्चांना उधाण आले होते दरम्यान, विधानसभेच्या अधिवेशनात हा विषय मागे पडला. नवे प्रदेशाध्यक्ष लवकर निर्णय घेतील अशी अपेक्षा होती. त्यानंतर आता पहलगाम येथील दहशतवादी हल्लामुळे केंद्रीय नेते व्यस्त असल्याने फेरबदल लांबणीवर पडल्याचे सांगितले जाते.