पणजी : गोवा काँग्रेसचे प्रदेशाध्यक्ष गिरीश चोडणकर यांनी आपल्या पदाचा राजीनामा दिला आहे. नुकत्याच पार पडलेल्या विधानसभा निवडणुकीत पक्षाच्या खराब कामगिरीची नैतिक जबाबदारी स्वीकारून पदाचा राजीनामा चोडणकरांनी दिला आहे. गिरीश चोडणकरांनी आपला राजीनामा हायकमांडला पाठवल्याची माहिती गोवा काँग्रेस प्रभारी दिनेश गुंडू राव यांनी दिली आहे. (Girish Chodankar News)

40 सदस्यीय गोवा विधानसभेच्या नुकत्याच झालेल्या निवडणुकीत (Goa Election) गिरीश चोडणकर काँग्रेसचे नेतृत्त्व करत होते. या निवडणुकीच काँग्रेसने 11 जागा जिंकल्या आणि त्याचा मित्रपक्ष गोवा फॉरवर्ड पार्टीला एक जागा मिळाली, तर भाजप 20 जागा मिळवून सर्वात मोठा पक्ष ठरला आहे. 10 मार्च रोजी मतदानाचा निकाल जाहीर झाल्यानंतर चोडणकर यांनी आपल्या पक्षाच्या खराब प्रदर्शनाची नैतिक जबाबदारी स्वीकारून राजीनामा देण्याची तयारी दर्शवली होती. चोडणकर यांचा राजीनामा स्वीकारण्यात येणार असून त्यांच्या जागी नवा चेहरा येणार असल्याची माहिती काँग्रेसमधील सूत्रांनी दिली आहे.

गिरीश चोडणकरांच्या राजीनाम्यानंतर संकल्प आमोणकर, अॅलेक्स सिक्वेरा आणि एल्विस गोम्स हे नेते काँग्रेस (Congress) प्रदेशाध्यक्ष पदासाठी आघाडीवर असल्याची माहिती आहे. संकल्प आमोणकर आणि सिक्वेरा यांनी नुकत्याच झालेल्या विधानसभा निवडणुकीत विजय मिळवला, तर गोम्स यांनी पणजी (Panjim) विधानसभा मतदारसंघातून निवडणूक लढवली होती, ज्यात बाबूश मोन्सेरात यांच्याकडून त्यांना पराभव स्वीकारावा लागला होता. मडगावचे आमदार आणि काँग्रेसचे ज्येष्ठ नेते दिगंबर कामत यांचं नावही पक्षाकडून विचारात घेतलं जाण्याची शक्यता आहे.