Goa Shigmotsav 2023: डिचोलीतील विविध भागात सध्या शिगमोत्सवाचे आकर्षण आणि पारंपरिक लोकनृत्य असलेल्या ‘घोडेमोडणी’चा उत्साह संचारला आहे.

ढोल-ताशांच्या ‘घणचे कटर घण’च्या तालावर गुरुवारी (ता. ९) सायंकाळी डिचोलीतील बोर्डे येथील घोडेमोडणी मोठ्या उत्साहात साजरी झाली.

सायंकाळी गावतड येथील श्री सातेरी मंदिराजवळील चव्हाट्यावर चार घोडे सजविण्यात आल्यानंतर गाऱ्हाणे घालण्यात आले. वाजतगाजत घोडे कोराटीचे मळ येथे आल्यानंतर हजारो नागरिकांच्या उपस्थितीत घोडेमोडणीला सुरवात झाली.

श्री वडेश्वर देवस्थानकडून भायलीपेठ ते श्री शांतादुर्गा सर्कलपर्यंत असे पाच फेरे मारल्यानंतर घोडे पुन्हा वडाजवळ आले. त्या ठिकाणी घोड्यांची पूजा आदी पारंपरिक विधी झाल्यानंतर घोड्यांचे गावतड येथे प्रस्थान होऊन घोडेमोडणीची उत्साहात सांगता झाली.

घोडेमोडणीचा आनंद घेण्यासाठी लोकांनी भायलीपेठ मार्गाच्या दुतर्फा गर्दी केली होती. डिचोलीचे आमदार डॉ. चंद्रकांत शेट्ये हे सुद्धा घोडेमोडणीच्या उत्साहात सहभागी झाले होते. त्यांनी घोडेमोडणीचा आनंद घेतला.

आज पाच ठिकाणी घोडेमोडणी:-

शुक्रवारी (ता. १०) डिचोली शहरासह सर्वण, मये, कुडचिरे आणि लाडफे मिळून पाच ठिकाणी परंपरेप्रमाणे घोडेमोडणी साजरी होणार आहे.

गावकरवाडा येथील श्री शांतादुर्गा देवस्थान आणि लाडफे येथील श्री सातेरी केळबाई देवस्थानची घोडेमोडणी सायंकाळी तर मये येथील श्री माया केळबाय देवस्थान, कुडचिरे आणि सर्वण येथील श्री कुळमाया सातेरी श्यामपुरुष देवस्थानची घोडेमोडणी रात्री साजरी होणार आहे.