म्हापसा : गणेशपुरी, म्हापसा येथील डॉ. घाणेकर यांच्या बंगल्यावरील सशस्त्र दरोडाप्रकरणी म्हापसा पोलिसांनी अटक केलेल्या दोघाही संशयितांची १४ दिवस न्यायालयीन कोठडीत रवानगी करण्यात आली.

दरम्यान, दरोडेखोर टोळीशी संपर्कात असलेल्या इतर साथीदारांची चौकशी करण्यासाठी गोवा पोलिसांची विविध पथके ही पश्चिम बंगाल, हैदराबाद, आंध्रप्रदेश, कर्नाटक व मुंबईमध्ये पाठवली आहेत. संशयित संतोष बी. (२७, रा. बंगळूरू) व सफिकुल रोहूल अमीर (३७, रा. बंगळूरू) या दोघाही मूळ बांगलादेशी नागरिकांना म्हापसा पोलिसांनी अटक केली होती.

मंगळवार, २८ रोजी, संशयितांना पोलिसांनी म्हापसा प्रथमश्रेणी न्यायालयात हजर केले असता त्यांना १४ दिवस न्यायालयीन कोठडी सुनावली. नंतर कोलवाळ कारागृहात संशयितांची रवानगीकरण्यात आली. दरम्यान, गेल्या ७ ऑक्टोबर रोजी डॉ. महेंद्र घाणेकर यांच्या बंगल्यावर हा सशस्त्र दरोडा पडला होता.

दरोडेखोरांनी पीडित घाणेकर कुटूंबियांना धमकावून व बंधक बनवून घरातील ३५ लाखांचा ऐवज लुटून नेला होता. याप्रकरणी पोलिसांनी भारतीय.न्याय संहितेच्या ३३१(३), ११५ (२), ३५१ (३), १२६ (२), ३१० (२), ६१(२), १११ व ३(५) कलमान्वये गुन्हा नोंद केलेला आहे. पुढील तपास म्हापसा पोलिस करत आहेत. दरोड्याच्या घटनेनंतर राज्यात गुन्हे वाढल्याची आणि सरकारचे गुन्हेगारीवर नियंत्रण नसल्याची टीका विरोधी पक्षांकडून होत आहे.