Ganesh Chaturthi : बाप्पाच्या आगमनासाठी आता केवळ आठ-दहा दिवसांचा कालावधी उरला आहे. जस-जसे गणपती बाप्पाच्या आगमनाचे दिवस जवळ येऊ लागतात, तस-तशी आतुरता ही अधिक वाढू लागते. बाप्पा आपल्या घरी येणार यासाठी संपूर्ण घराची झाडलोट- रंगरंगोटी, काही जुन्या घरांमध्ये पताका लावणे आदी कामांना वेग येतो.

गोव्यात घरातील महिला चतुर्थीसाठी लागणारे गोडपदार्थ प्रामुख्याने नेवऱ्या, दोन प्रकारच्या बनविल्या जातात. एक पिठ्याच्या व दुसऱ्या रव्याच्या. पिठ्याच्या नेवऱ्यांमध्ये पिठीचे सारण भरले जाते. तर रव्याच्या नेवऱ्यांमध्ये रव्यापासून तयार केलेलं सारण. बाप्पाच्या पूजेत लागणारी देवभांडी, पंचपात्र, पडगा, कलश, ताम्हण, दिवे, समयी,पंचारती धुपारती आदी सर्व साहित्य स्वच्छ केले जाते. लहान-बालकांची, तसेच किशोरवयीन मुलांच्या आपण कोणते कपडे घेणार याबाबत गप्पा रंगतात. सकाळी उठून कामाला जाणे आणि रात्रभर तयारी करणे हा आता नित्यक्रमच झालेला आहे.

गणेशोत्सवात सर्वात अधिक महत्त्व आरतीला. गावा-गावात, वाड्या-वाड्यात सध्या घुमट वादनाच्या तयारीला जोर आला आहे. आरतीच्या रंगीत तालमी होऊ लागल्या आहे. घुमट, समेळ, कासाळ्याचे तालाने, आणि विविध देवतांच्या आरतीच्या सूरांमुळे सर्वत्र भक्तिमय वातावरण होत आहे.