सणासुदीच्या काळात मोठ्या प्रमाणावर निकृष्ट दर्जाची मिठाई विक्री केली जाते तसेच, त्याच्या वजनात देखील घोळ केला जातो.

यापार्श्वभूमीवर राज्यातील अन्न आणि औषध प्रशासन तसेच वजन, माप खाते सतर्क झाले असून, ग्राहकांनी त्यांनी काही सुचना केल्या आहेत. याशिवाय मिठाई विक्रेत्यांना देखील सतर्क राहण्याचा इशारा देण्यात आला आहे.

गोवा वजन व माप खात्याच्या वतीने संपूर्ण गोव्यात मोहिम राबवली जाणार आहे. याकाळात मिठाईचा दर्जा आणि वजन याबाबत फसवेगिरी केल्यास तात्काळ कारवाई केली जाणार आहे. त्यामुळे गोव्यातील मिठाई विक्रेत्यांनी याबाबत काळजी घेऊन सर्तक राहावे असे खात्यातर्फे कळविण्यात आले आहे.

गेल्या आठवड्यात बोर्डा, आर्लेम व घोगळ येथे मिठाईच्या दुकानावर छापा टाकण्यात आला. त्यापूर्वी काझीवाडा, पंडितवाडा व तिस्क येथील दुकानातही धडक कारवाई करण्यात आली. यापुढे देखील अशीच कारवाई सुरु राहणार असल्याची माहिती खात्याच्या वतीन कळविली आहे.

ग्राहकांनी घ्यावी काळजी

मिठाई खरेदी करण्यापूर्वी वजनकाटा शून्य आहे का याची खात्री करा.

रिकाम्या बॉक्सचे देखील वजन विचारात घ्या, मिठाई आणि बॉक्सचे वजन दुकानदाराकडून सुनिश्चित करा.

गणेशोत्सवाच्या काळात निकृष्ट दर्जाची मिठाईची विक्री होण्याची शक्यता असते. तसेच, मिठाई तयार करताना पुरेशी काळजी घेतली जात नाही. त्यामुळे ग्राहकांनी काळजी घ्यावी असे आवाहन करण्यात आले आहे.