‘एक के उपर एक फ्री’ हा फॉर्म्युला आता कोलवा पोलिसांनीही अंगीकारला आहे की काय, हे कळत नाही; पण या पोलिस स्थानकाच्या हद्दीत जिथे धीरयो (बैलांच्या झुंजी) लावल्या जातात तिथे आता गडगडाही (जुगार) जोमात चालू असतो.

नवल वाटण्याजोगी गोष्ट म्हणजे याबाबत सर्व जगाला माहिती असते. फक्त पोलिस अनभिज्ञ असतात. मागच्या रविवारी पेडा-बाणावली येथे धीरयोचे आयोजन केले होते. या जागेपासून अवघ्या 100 मीटर अंतरावर गडगडाही चालू होता. धीरयो आणि गडगडा यावर लाखो रुपयांची पैज लावली जात होती.

हे प्रकार फक्त बाणावली येथेच चालू नसून दक्षिण गोव्यातील किनारपट्टी भागात सगळीकडेच चालू असतात. यासंबंधी पोलिसांना कळविल्यास एकतर ते त्याकडे दुर्लक्ष करतात किंवा घटनास्थळी उशिरा पोहोचतात, अशी प्रतिक्रिया स्थानिक जॉन फर्नांडिस यांनी व्यक्त केली.

पैशांची उधळपट्टी

याप्रकरणी चौकशी केली असता मिळालेल्या माहितीनुसार, एका स्थानिक राजकारण्याच्या पुतण्याच्या आशीर्वादाने हे सगळे प्रकार चालू असून त्यामुळे पोलिसही त्यांच्या वाटेला जात नाहीत.

या धीरयोंवर लोक लाखो रुपयांची पैज लावत असून गडगड्यावरही पैसे उधळले जात असल्याची माहिती असून कोलवा पोलिसांना विचारले तर ते हे आम्हाला काहीच माहीत नाही, असे सांगून कानावर हात ठेवतात.