Goa Beach: कळंगुट तसेच कांदोळी येथील किनारपट्टी भागात इंधनविहिरी तसेच सांडपाण्याच्या टाक्या वाळूच्या खाली खोदण्यात आल्या आहेत तरी त्याकडे डोळेझाक केली जात असल्याच्या जनहित याचिकेवरील सुनावणीवेळी मुंबई उच्च न्यायालयाच्या गोवा खंडपीठाने पर्यटन अधिकाऱ्यांना धारेवर धरले.

पर्यटन खात्याने किनारपट्टी परिसरात केलेल्या तपासणीचा अहवाल सादर करण्याचे तोंडी निर्देश देत ही सुनावणी बुधवार, 8 रोजी ठेवली आहे. कांदोळी किनारपट्टी परिसरातील रेवबेन फ्रांको यांनी ही जनहित याचिका सादर केली आहे.

कळंगुट तसेच कांदोळी येथील किनारपट्टीवरील वाळूच्या खाली काही शॅकधारकांनी इंधनविहिरी खोदल्या असून त्याला प्लास्टिक पाईप जोडले आहेत. काहींनी खोदकाम करून या वाळूखाली सांडपाण्याच्या टाक्या बनविल्या आहेत. हे सीआरझेड कायद्याचे उल्लंघन आहे.

कामचुकारपणाचे नोंदविले निरीक्षण

यावेळी उपस्थित असलेल्या पर्यटन खात्याच्या उपसंचालकांनी स्पष्टीकरण करण्याऐवजी याचिकेत उपस्थित करण्यात आलेल्या मुद्यांची शहानिशा करण्यासाठी मुदत मागितली व संबंधित अधिकारी हे गोव्याबाहेर टूरवर जाणार असल्याचे कारण दिले.

भूजल नियमन कायद्याचे उल्लंघन होत असूनही पर्यटन खाते कोणतीच कारवाई करत नाही व याचिकेतील मुद्यांच्या शहानिशेसाठी मुदत देण्याची केलेली विनंती हा कामचुकारपणा होत असल्याचे तोंडी निरीक्षण खंडपीठाने नोंदविले.