Francisco Sardinha: गोव्यात गेल्या काही दिवसांत दक्षिण गोव्याचे खासदार फ्रान्सिस सार्दिन आणि माजी मुख्यमंत्री चर्चिल आलेमाव यांच्यात कलगीतुरा रंगला आहे. त्यात आता खासदार सार्दिन यांनी आलेमाव यांच्यावर निशाणा साधला आहे. चर्चिल हे कुडतरीच काय बाणावलीतुनही निवडून येऊ शकणार नाहीत, असे वक्तव्य सार्दिन यांनी केले आहे.

सार्दिन म्हणाले की, कुडतरी किंवा बाणावलीतूनही चर्चिल आलेमाव आता निवडून येऊ शकत नाहीत. ते आता केवळ केंद्र, राज्य सरकारला पाठिंबा दर्शवून पैशासाठी इतरांपुढे हात पसरू शकतात.

यापुर्वी चर्चिल आलेमाव म्हणाले होते की, कुडतरी हा माझा मतदारसंघ असून येथून मी कधीही निवडून येऊ शकतो. कारण, कुडतरीचे लोक माझ्यावर प्रेम करतात. त्यापुर्वीही चर्चिल यांनी केंद्रासह राज्यातील भाजप सरकारचे गोडवे गाताना आगामी लोकसभा निवडणुकीत गोव्यातील लोकसभेच्या दोन्ही जागांवर भाजप जिंकून येईल, असे भाकीत केले होते.

त्यावर फ्रान्सिस सार्दिन यांच्यासह विजय सरदेसाई आणि आलेक्स रेजिनाल्ड यांनीही आलेमाव यांच्यावर टीका केली होती.

तेव्हापासून चर्चिल आलेमाव हे चर्चेच्या केंद्रस्थानी आले आहेत. ते सातत्याने भाजपची बाजू लावून धरताहेत, त्यांनी त्यांचा मुलगा आणि मुलगीदेखील आगामी विधानसभा निवडणूक लढवणार असल्याचे त्यांनी जाहीर केले होते.