Parra Rioting Case: दशकापूर्वी लोबोवाडा - पर्रा येथील दंगलप्रकरण व पर्वरी येथील राष्ट्रीय महामार्ग अडविल्याप्रकरणी पोलिसांनी दाखल केलेला गुन्हा पुराव्याअभावी सिद्ध होत नसल्याने चार नायजेरियन संंशयितांना म्हापसा दिवाणी न्यायालयाने निर्दोषमुक्त केले.

या नायजेरियनच्या गटाने दंगल तसेच महामार्ग अडविताना पोलिसांविरुद्ध बळाचा वापर केल्याचा कोणताही पुरावा सादर केलेला नाही. त्यामुळे पुराव्याअभावी त्यांना निर्दोष ठरवण्यात येत असल्याचे दिलेल्या आदेशात म्हटले आहे.

नायजेरियनच्या गटाने त्यांच्या एका साथीदाराचा मृत्यू झाल्याने पर्रा येथे दंगल घडवून आणली होती तसेच पर्वरी येथील राष्ट्रीय महामार्ग अडवून त्याचा मृतदेह शववाहिकेतून बाहेर काढून रस्त्यावर ठेवला होता.

हा गट हैदोस घालत होता तसेच पोलिसांना ड्युटी करण्यापासून अडथळे आणत होता. त्यांना अटक करण्यापासून पोलिसांना कोणी रोखले होते, असा प्रश्‍न न्यायालयाने उपस्थित केला आहे. त्यामुळे नायजेरियन नागरिकांचा गट त्यांच्या ओबोदो उझोना सिमेओन याचा मृतदेह पाहण्यासाठी जमले होते. त्यामुळे त्यांचा जमाव बेकायदा होता, असा निष्कर्ष काढता येत नाही. या घटनेतील सर्व संशयित एकसारखे दिसत असल्याने साक्षीदार वा तक्रारदार त्यांची ओळख पटवू शकलेले नाहीत.

तपासकामात अनेक त्रुटी

पर्वरी येथे नायजेरियनना अटक केल्याची नोंद पर्वरी पोलिस स्थानकात नाही. शववाहिकेच्या चालकाची न्यायालयात जबानी नोंदवलेली नाही. ही घटना 13 ऑक्टोबर 2013 रोजी झाली.

मात्र, पंचनामा त्याच दिवशी न करता दुसऱ्या दिवशी केला होता. त्याच दिवशी पंचनामा तपास अधिकाऱ्यांनी का केला नाही, याचे उत्तर पोलिसांकडे नाही. पर्रा व पर्वरी येथील गुन्ह्यात साम्य असून पोलिसांनी तपासकामात अनेक त्रुटी ठेवल्या आहेत, असे निरीक्षण न्यायालयाने नोंदवले आहे.