Constable Amit Naik Arrest

पणजी: गोवा जमीन हडप प्रकरणातील आरोपी सुलेमान खान याला पोलीस कोठडीतून पळून जायला मदत केलेल्या कॉन्स्टेबल अमित नाईक याला चार दिवसांची पोलीस कोठडी सुनावण्यात आली आहे. यापूर्वी आयआरबी कॉन्स्टेबलची नोकरीतून हकालपट्टी करण्यात आली होती आणि कॉन्स्टेबल अमित नाईक हुबळी येथे पोलिसांना शरण आला होता.

पोलिसांनी त्याच्या विरोधात शिस्तभंगाची कारवाई करत नोकरीतून काढून टाकले.पोलिस कॉन्स्टेबल अमित नाईक याने आरोपी सुलेमान खानला १३ डिसेंबर रोजी पहाटे अडीच वाजता कोठडीतून बाहेर काढत पळून जायला मदत केली होती.

५५ वर्षीय आरोपी सुलेमान खान याच्यावर जमीन हडप प्रकरण आणि इतर गुन्हे दाखल झाले आहेत. हा आरोपी गेल्या साडेचार वर्षांपासून फरार होता आणि पोलिसांना १२ डिसेंबर रोजी त्याला पकडायला यश मिळाले होते, मात्र एवढ्या भयंकर आरोपीला एका पोलिस कॉन्स्टेबलनेच पळून जायला मदत केल्याने सगळीकडेच खळबळ उडाली होती.

पोलिस कॉन्स्टेबल अमित नाईक याने सुलेमान खानला पळून जायला मदत केली आणि याप्रकरणी जुने गोवे पोलिस स्थानकात गुन्हा नोंद करण्यात आला होता.

अमित नाईक कोण आहे?

गोमंतकीय वाटणारा आयआरबीचा कॉन्स्टेबल अमित मूळचा कर्नाटकातील आहे. सध्या तो जयरामनगर- दाबोळी येथे राहायला असून, त्यांचा चांगला बंगला आहे. वडिलांचे मिक्सर दुरुस्तीचे दुकान आहे. याशिवाय काही दुकाने त्याने भाड्याने दिली आहेत. अमित कर्तव्यावर असताना इतरांवर दादागिरी करायचा असे माहिती समोर आलीय.