आंतरराष्ट्रीय क्रूझ टर्मिनलमुळे गोव्याचा कायापालट होईल असे मत केंद्रीय जहाजबांधणी आणि जलमार्ग मंत्री सर्बानंद सोनोवाल यांनी व्यक्त केले. मुरगाव बंदर प्राधिकरणाच्या आंतरराष्ट्रीय क्रूझ टर्मिनलची सोनावाल यांच्या हस्ते आज पायाभरणी झाली. यावेळी ते बोलत होते.

(Foundation stone laid for Mormugao Port project by minstar Sarbananda Sonowal)

यावेळी बोलताना ते म्हणाले की, पर्यटन पायाभूत सुविधा विकास’या योजनेअंतर्गत हा प्रकल्प गोव्याचे प्रवेशद्वार ठरेल, तसेच सार्वजनिक खाजगी भागीदारी ( PPP ) पद्धतीने टर्मिनलच्या देखभालीसाठी आणखी 21 कोटींची गुंतवणूक केली जाईल. अशी घोषणा त्यांनी यावेळी केली.

देशांतर्गत क्रूझसाठी अतिरिक्त 13.4 एकर जमिनीवर हा प्रकल्प विकसित केला जाईल. या प्रकल्पामध्ये आंतरराष्ट्रीय आणि देशांतर्गत क्रूझ प्रवाशांच्या फायद्यासाठी रो-रो, रो-पॅक्स आणि फेरी सेवेची सुविधा देखील समाविष्ट आहे. या जलमार्गाद्वारे वाहतुकीचा वापर उत्तर गोवा आणि इतर पर्यटन स्थळांवर जाण्यासाठी केला जाईल असे ते म्हणाले. या प्रकल्पाची अंदाजे किंमत 101.72 कोटी इतकी असल्याचं ही ते म्हणाले. यावेळी केंद्रीय बंदरे, जहाजबांधणी आणि जलमार्ग मंत्री सर्बानंद सोनोवाल, मुख्यमंत्री प्रमोद सावंत, केंद्रीय मंत्री श्रीपाद नाईक, आणि अन्य नेते उपस्थित होते.