अलीकडच्या घडामोडींचा माझ्यावर परिणाम झालाय यात शंकाच नाही. पण आम्ही सैनिक आहोत आणि टीका सहन करण्याची माझी क्षमता आहे. मी कोणावरही रागावलेलो नाही किंवा माझ्‍या मनात कोणाबद्दलही वितुष्‍ट नाही.

पण आपण परस्परविरोधी उद्दिष्टे असलेल्या लोकांसमवेत राहत असल्याने घर्षण होणे निश्चित आहे. गोव्याच्या गोड आठवणी सोबत घेऊन जात आहे, ही वाक्ये आहेत माजी पोलिस महासंचालक जसपाल सिंग यांनी पदभार सोडताना दिलेल्या लेखी पत्रातील.

सदर पत्र सिंग यांनी आपल्या सहकाऱ्यांना उद्देशून लिहिले आहे. पोलिस मुख्यालयात आज सकाळी त्यांनी नवे पोलिस महासंचालक आलोक कुमार यांच्याकडे पदभार सोपवला. जसपाल सिंग यांची बदली आसगाव येथील प्रदीप आगरवाडेकर यांचे घर पाडण्याच्या आरोपातील कथित सहभागानंतर झाली आहे. त्यामुळे जाताना ते काय भावना व्यक्त करतात, याकडे सर्वांचे विशेषत: समस्‍त गोमंतकीयांचे लक्ष लागून राहिले होते.

शक्‍य तेवढ्या चुकीच्‍या गोष्‍टी टाळल्‍या

जसपाल सिंग यांनी पत्रात म्हटले आहे, आम्‍ही जेव्‍हा सेवा बजावतो, तेव्‍हा लोकांशी संवाद, संबंध येतो. संवादाच्‍या अभावामुळे काही गोष्टी चुकीच्या होऊ शकतात. म्हणून, मी शक्य तेवढा संबंधित अधिकारी, कर्मचाऱ्यांशी संवाद साधला व चुकीच्‍या गोष्‍टी टाळण्‍याचा प्रयत्न केला. माझे कार्य, दृष्टिकोन आणि शून्य त्रुटी धोरणामुळे काहींनी मला तुच्छ लेखले असेल. पण मला त्‍याची पर्वा नाही.