Goa Coast Security: गोव्यातील समुद्रकिनाऱ्यांवरील अवैध प्रकार थांबावेत, किनाऱ्यांवर वाहने चालवू नयेत आणि एकुणच किनाऱ्यांच्या सुरक्षिततेसाठी वन विभागाने पावले उचलण्यास सुरवात केली आहे.

त्यानुसार आता राज्याचा पर्यटन विभाग, मत्स्य व्यवसाय विभाग, दृष्टी जीवरक्षक, पर्यटक पोलिस, शॅक मालक आणि स्वयंसेवी संस्था यांची मदत यात घेण्यात येणार आहे. सागरी जैवविविधतेच्या संरक्षणासह किनारपट्टींवरील अवैध कारवायांबाबत जागरूकता निर्माण करण्यासाठी हे विभाग वन विभागाला मदत करतील.

मुख्य वनसंरक्षक सौरभ कुमार यांच्या हवाल्याने इंग्रजी प्रसारमाध्यमांनी याबाबतचे वृत्त दिले आहे. सौरभ कुमार यांनी म्हटले आहे की, सर्व विभागांद्वारे एक सुव्यवस्थित संयुक्त व्यापक जनजागृती कार्यक्रम आखला जात आहे.

लाइन विभाग, स्वयंसेवी संस्था, तज्ज्ञ संस्था आणि लोकसहभाग याद्वारे राज्याच्या संपूर्ण किनारपट्टीवर सुरक्षितता, समृद्ध सागरी जैवविविधतेचे संरक्षण, संवर्धन आणि शाश्वत विकासासाठी प्रयत्न केला जात आहे.

राज्याच्या वनविभागाने गेल्या डिसेंबरमध्ये प्रथमच गोव्याची किनारपट्टीची दोन मरीन रेंजमध्ये विभागणी केली होती. समुद्रकिनाऱ्यांवर वाहन चालवण्यासारख्या उल्लंघनांपासून गोव्याच्या किनारपट्टीचे संरक्षण करण्यासाठी दूत म्हणून काम करण्यासाठी वन विभाग आता वेगवेगळ्या घटकांना जोडण्याच्या प्रक्रियेत आहे.

या वर्षी जानेवारी आणि फेब्रुवारीमध्ये, या विभागांसमवेत दोन बैठका झाल्या असून लवकरच तिसरी बैठक होणार आहे. सर्व विभागातील प्रभावी आणि कार्यक्षम समन्वयावर भर देण्यावर या बैठकीत चर्चा झाली होती. सागरी संरक्षणासाठी एक मानक प्रोटोकॉल असावा, यावरही बैठकीत एकमत झाले होते.

दरम्यान, अधिकाधिक स्वयंसेवक नेमण्याचा प्रयत्न केला जात आहे. समुद्रकिनाऱ्यांवर वाहन चालवण्यास सक्त मनाई आहे. त्याच्या अंमलबजावणीवर लक्ष दिले जाईल.

सेंटर फॉर एन्व्हायर्न्मेंट एज्युकेशन आणि वाइल्डलाइफ कन्झर्वेशन सोसायटी यासारख्या संस्थांनीही यात सहभाग घेतला आहे.

दरम्यान, वनविभागाने प्रवाळ आणि खारफुटीच्या संरक्षणासाठी, सीआरझेड व्यवस्थापनासाठी आणि सागरी प्राण्यांच्या संरक्षणासाठी, कासव संवर्धन प्रकल्पाला अधिक बळकट करण्यासाठी मरीन रेंजेस स्थापन केल्या आहेत.