Siolim Bridge Stunt: गोव्यात येऊन प्रत्येक पर्यटक धमाल, मौजमस्ती करत असतो. पण, काही पर्यटक जीवावर बेतणारे आणि धोकादायक स्टंट तसेच, अवैध पद्धतीने काही कृत्य करण्याचा प्रयत्न करत असतात. वारंवार अशा घटना समोर आल्या आहेत.

यात प्रामुख्याने देशी पर्यटक अशा घटना करत असल्याचे दिसून आले आहे. पण, आता विदेशी पर्यटक देखील धोकादायक स्टंट करतानाची एक घटना समोर आली आहे.

समोर आलेल्या व्हिडिओनुसार, एक विदेशी पर्यटक शिवोली येथील पुलावर धोकादायक पद्धतीने स्टंट करताना दिसत आहे. पर्यटक पुलाच्या सुरक्षा भिंतीवर चढून त्यावर चालताना दिसत आहे. कोणताही आधार न घेता हा पर्यटक भिंतीवर चालत आहे.

दरम्यान, रस्त्यावरून जाणाऱ्या एका वाहन धारकाने या पर्यटकाचा व्हिडिओ शूट केला आहे. सध्या हा व्हिडिओ सोशल मिडियावर व्हायरल होत असून, लोकं या स्टंटवर चिंता व्यक्त करत आहेत.

शापोरा नदीवर असणारा शिवोली येथील पूल लांबी आणि उंचीने खूप मोठा असून, धोकादायक मानला जातो. नदीपात्र देखील मोठे आहे. दरम्यान, हा विदेशी पर्यटक कोणत्या देशातील आहे किंवा त्याचे नाव काय आहे? याबाबत माहिती मिळू शकली नाही.

अशा पद्धतीने स्टंट करून धोक्यात घालू नये असे आवाहन वारंवार सरकार व पर्यटन खात्याच्या वतीने केले जाते.