पणजी: हरियाणातून आलेला विदेशी बनावटीचा कोट्यवधींचा मद्यसाठा गोव्यात पकडला गेला. गोव्यात एकाच घाऊक वितरकाकडून विदेशी बनावटीचे मद्य सर्व विक्रेते घेतात. त्यामुळे एवढ्या मोठ्या प्रमाणात मद्य आयातीमागील खरा सूत्रधार कोण, हे अबकारी खात्याने शोधावे, अशी मागणी गोवा मद्य व्यापारी संघटनेने केली आहे.

याबाबतचे निवेदन संघटनेतर्फे आज अबकारी आयुक्त एस. एस. गिल यांना देण्यात आले. संघटनेचे अध्यक्ष दत्तप्रसाद नाईक म्हणाले की, काही दिवसांपूर्वी पत्रादेवी तपासणी नाक्यावर अबकारी अधिकाऱ्यांनी गोव्यात येणारा परदेशी बनावटीचे मद्याचा ट्रक पकडला होता. या परदेशी बनावटीच्या मद्याचे मुख्य वितरक गोव्यातील घाऊक विक्रीचे अधिकार ‘रॉयल लिक्विड’चे मालक प्रितेश देसाई यांच्या एकमेव कंपनीकडे आहेत.

म्हापशातील रमेश वाईन्सचा मालक साईश सावंत या अधिकृत विक्रेत्यास ३० एप्रिलला गुजरात पोलिस गोव्यात येऊन पकडून घेऊन गेले. २०२३ मध्ये गुजरातमध्ये ज्याच्याकडे मद्यसाठा सापडला त्याने या वाईन्सच्या मालकाचे नाव सांगितले होते.

पकडून घेऊन जाण्यापूर्वी सावंत यास पोलिसांनी कोणतीही कारणे दाखवा नोटीस पाठवली नाही. त्यामुळे असा प्रकार येथील विक्रेत्यांबाबत होऊ नये, तसेच गुजरात पोलिसांनी केलेल्या अवैध कारवाईबाबत त्यांच्यावर कायदेशीर कारवाई करावी, अशी संघटनेच्या वतीने मागणी करण्यात आल्याचे दत्तप्रसाद नाईक म्हणाले.