मडगाव: विदेशात नोकरीचे आमिष दाखवून अनेक बेरोजगार युवक-युवतींना लाखोंचा गंडा घालण्याची घटना कोलवा येथे घडली आहे. गुरुवारी बाणावलीचे आमदार वेन्झी व्हियेगस यांनी फसविले गेलेल्यांसोबत मडगाव पोलिस ठाणे गाठून या प्रकरणाची सखोल चौकशी करण्याची मागणी केली.

मोसमी खान पेरेरा या महिलेने ही फसवणूक केल्याचा आरोप असून ती नावेली येथे राहात असल्याचे व्हियेगस यांनी सांगितले. आतापर्यंत एकूण ९ जणांना या संशयित महिलेने २,९१,१७६ रुपयांचा गंडा घातला आहे. तिच्याकडून फसविले गेलेल्यांची संख्या वाढण्याची शक्यता व्यक्त केली जात आहे.

बेल्जियममध्ये नोकरी मिळवून देण्याचे आमिष दाखवून संशयित महिलेने एप्रिल २०२४ मध्ये संबंधितांकडून रक्कम उकळली होती. या घटनेला दोन वर्षे उलटून गेली असली तरी अद्याप कुणालाही विदेशात पाठविण्यात आलेले नाही.

आणि घेतलेली रक्कमही परत करण्यात आलेली नाही. आपण फसविले गेल्याचे लक्षात आल्यानंतर संबंधितांनी प्रथम कोलवा पोलिस ठाण्यात तक्रार नोंदविली होती.