Ponda Municipality: फोंडा नगरपालिका निवडणुका आता केवळ चार महिन्यांवर असून निवडणुकीचे पडघम वाजायला सुरुवात झाली आहे. अनेक इच्छुक उमेदवार तयारीला लागले आहेत. यंदाची निवडणूक रंगतदार होणार असे संकेत मिळत आहेत.

सध्याचे बरेच नगरसेवक परत एकदा बोहल्यावर चढण्याच्या तयारीला लागले असून ते आपले प्रगती पुस्तक घेऊन मतदारांचे उंबरठे झिजवताना दिसत आहेत. पण यावेळीही प्रभागाची संख्या वाढणार असे संकेत मिळायला लागले आहेत.

दरम्यान, तसे झाल्यास सगळे प्रभाग ‘उलटे पुलटे’ होऊ शकतात. आणि मग त्यातून काही जणांची पत्ते कट होऊ शकतात. सध्या रवी नाईक भाजपचे आमदार तथा मंत्री असल्यामुळे चेंडू त्यांच्या रिंगणात असणार यात संदेह नाही. त्यांनीही आपले पॅनल रिंगणात उतरवण्याची तयारी सुरू केली असून काही उमेदवारही निश्‍चित केले असल्याचे समजते.

काँग्रेसतर्फे फोंडा मतदारसंघाचे काँग्रेसचे मागच्या निवडणुकीतील उमेदवार राजेश वेरेकर हे आपले काही उमेदवार रिंगणात उतरवणार असल्याचे कळते. काही नगरसेवकांच्या विरोधात हवा वाहत असल्याचे मतदारांचा कानोसा घेतल्यावर दिसून आले आहे. त्यामुळे बहुतेक प्रभागात चुरशीच्या लढती होण्याची शक्यता आहे.

भाटीकर सक्रिय

सरकारात मगो व भाजपची युती असल्यामुळे मगो पक्ष थेटपणे रिंगणात उतरण्याची शक्यता नसली तरी डॉ. केतन भाटीकर सक्रिय असून ते ''रायझिंग फोंडातर्फे'' नगरपालिकेच्या निवडणुकीच्या उतरण्याची दाट शक्यता दिसत आहे.