MLA Michael Lobo: राज्याला शहरी तोंडवळा असला तरी ग्रामीण आणि निमशहरी भागही बऱ्यापैकी आहे. पंचायत सदस्य आणि सरपंचांनी या भागाच्या विकासावर म्हणजे त्या भागात राहणाऱ्या जनतेच्या विकासावर भर दिला पाहिजे, असे आवाहन आमदार मायकल लोबो यांनी शनिवारी (ता.१४) पर्वरी येथे केले.

विद्याप्रबोधिनी महाविद्यालयाने आयोजित केलेल्या लोकप्रतिनिधी संमेलनात ते बोलत होते. या संमेलनाला पर्यटनमंत्री रोहन खंवटे, साळगावचे आमदार केदार नाईक, हळदोणेचे आमदार ॲड. कार्लुस फेरेरा उपस्थित नव्हते. यावेळी मंचावर पंचायतींचे प्रतिनिधी, प्रबोधन संस्थेचे अध्यक्ष संजय वालावलकर, राजेंद्र भोबे, श्रीहरी आठल्ये, उल्हास अस्नोडकर उपस्थित होते.

दिव्या चारी यांच्या ईशस्तवनाने संमेलनास सुरवात झाली. प्राचार्य भूषण भावे यांनी प्रास्ताविक केले. संजय वालावलकर यांनी प्रबोधन संस्थेच्या वाटचालीचा आढावा घेऊन महाविद्यालयाच्या विविध उपक्रमांची माहिती दिली. कार्यक्रमाचे संयोजक स्वप्नील गावकर यांनी कार्यक्रमाचा हेतू विषद केला. पाहुण्यांची ओळख हेमा सावंत, आशय नाईक, प्रा. वर्षा इंगळहली यांनी करून दिली. मेळाव्यातील मार्गदर्शकांना संजय वालावलकर यांच्या हस्ते भेटवस्तू प्रदान करण्यात आल्या.

संमेलनात अरुण भट (टी.जे.एस.बी.), मविंसी लकाहरिया (एस.बी.आई.), पी. डी. आंबोटकर (खादी ग्रामोद्योग), नकुळ बेंद्रे (एल.आई.सी.), अविनाश शिंदे (आर.बी.आई.), एन. बोंमास्वामी (वैज्ञानिक), विश्वास कदम (नाबार्ड) यांनी मार्गदर्शन केले. सूत्रसंचालन प्रज्ञा तारी यांनी, तर आभारप्रदर्शन प्रा. अरुण गवस यांनी केले.