Flights To Goa: गोव्यात दोन्ही विमानतळ सध्या सुसाट सुरू आहेत. देशातील विविध शहरातून गोव्याला थेट विमानसेवा सुरू केली जात आहे. इंडिगो, स्पाईसजेट, एअर इंडिया, अकासा यासारख्या कंपन्या विविध शहरे आणि गोवा अशी थेट कनेक्टेव्हिटी सुविधा निर्माण करत आहेत.

त्यातच आता पंजाब, जालंधरच्या आदमपूर विमानतळावरून गोव्यासह विविध शहरांसाठी थेट विमानसेवा सुरू केली जाणार आहे. नुकतेच आदमपूर विमानतळावर नवीन टर्मिनल उभारण्याचे काम सुरु आहे.

मिळालेल्या माहितीनुसार, 110 कोटी रुपये खर्चून जालंधरच्या आदमपूर विमानतळाचे नवीन टर्मिनल उभारण्याचे काम सुरु आहे. येथून तीन वर्षांनंतर पुन्हा उड्डाणे सुरू होणार आहेत. नुकतेच नवनियुक्त लोकसभा खासदार सुशील रिंकू यांनी भेट देऊन कामाला गती देण्यास सांगितले.

केंद्रीय नागरी उड्डाण मंत्रालयाने बेंगळुरू, गोवा, कोलकाता, नांदेड येथे थेट विमानसेवा सुरू करण्यास ग्रीन सिग्नल दिला आहे. स्पाईसजेट आणि स्टार एअर एअरलाइन्स कंपन्यांनी आदमपूरहून विमान उड्डाणासाठी निविदा काढल्या आहेत.

आदमपूर विमानतळावरून 1 मे 2018 रोजी दिल्ली-आदमपूर-दिल्ली सेक्टरचे पहिले नागरी उड्डाण येथून सुरू झाले. 2018 मध्ये तात्पुरते बांधलेले बहुतांश सिव्हिल टर्मिनल फायबर, प्लायवूड आणि लोखंडी पत्र्यांचे होते. हे टर्मिनल नवीन इमारतीत स्थलांतरित केले जाणार होते जे मार्च 2020 मध्येच पूर्ण होतील असे सांगितले जात होते.

दरम्यान, नवीन इमारतीच्या बांधकामाला विलंब झाला आणि 2023 मध्ये टर्मिनल तयार झाले. मात्र, टॅक्सी ट्रॅकचे बांधकाम सुरू असल्याने ते कार्यान्वित झालेले नाही. येथून स्पाईस जेटचे विमान नवी दिल्लीपर्यंत धावत असले तरी ही सेवा तीन वर्षांपासून बंद होती. आता नवीन टर्मिनल तयार आहे आणि येथून लवकरच उड्डाणे सुरू होऊ शकतात.