Fishing Boats Fire in Goa: बाणावली येथे बोटींना व मासेमारी जाळ्‍यांना आग लावल्याप्रकरणी कोलवा पोलिसांनी रोफिलियो फर्नांडिस या युवकाला अटक केली.

तो वाडी-बाणावली येथील रहिवाशी आहे. या प्रकरणी रात्री उशिरा पोलिसांनी ट्रेझर फर्नांडिस या मुख्‍य आरोपीच्‍याही मुसक्‍या आवळल्‍या.

गेल्‍या 26 फेब्रुवारी रोजी पहाटे अडीचच्या सुमारास वाडी-बाणावली येथील समुद्रकिनाऱ्यावर नांगरून ठेवलेल्या दोन बोटींना आग लावण्याचा प्रकार घडला होता. त्‍यात बोटमालकांचे 10 ते 12 लाख रुपयांचे नुकसान झाले होते.

या प्रकरणी कोलवा पोलिसांत अज्ञात व्यक्तीविरोधात तक्रार दाखल करण्‍यात आली होती. पोलिसांनी दिलेल्या माहितीनुसार, पूर्ववैमनस्यातून आग लावण्याचा हा प्रकार घडला होता.

स्थानिक आमदार व्‍हेंझी व्हिएगस यांनीही या प्रकरणी लक्ष घालून तपास करण्याची मागणी केली होती. सासष्टीचे उपअधीक्षक संतोष देसाई अधिक तपास करीत आहेत.