Goa News: राज्यात नोव्हेंबर तसेच डिसेंबरच्या पूर्वार्धात शंभर रूपयांना वीस बांगडे मिळत होते, परंतु आता तेच बांगडे 200 रुपये किलो दराने विकले जात आहेत. मध्यम आकाराचे बांगडे शंभर रुपयांना 6 ते 7 विकले जातात.

इतर मासळीच्या दरात देखील काही प्रमाणात वाढ झाली आहे. 500 रुपये किलोने मिळणारा इसवण आता 600 ते 700 रुपये किलो दराने विक्री सुरू आहे.

राज्यात नववर्षाच्या काही दिवस अगोदर मासळी दरात वाढ झाली. त्यात काही प्रमाण चढउतार होत आहेत मात्र दर कायम असल्याने आता सर्वसामान्य नागरिकांच्या खिशाला ते परवडत नाही. गोमंतकीय हे मत्सप्रेमी असल्याने आठवड्यातून किमान दोनदा तर मासळी हवीच असते.

अशा परिस्थितीत वाढलेले दर पाहता ओल्या मासळी आवड खाऱ्या बांगड्यावर भागविण्याची स्थिती नागरिकांवर येऊ शकते. आज पणजी बाजारात इसवण, कोळंबी, पापलेट, माणकी, लेपो, खुबे आदी माशांना अधिक मागणी आहे.

पापलेट हजार रुपये, कोळंबी आकाराप्रमाणे 300 ते 500 रुपये, इसवण 600 रुपये प्रतिकिलो दराने विकले जात आहेत.

खाद्यसंस्कृतीचा आस्वाद

अनेक पर्यटक गोव्यात केवळ गोमंतकीय खाद्यसंस्कृतीचा आस्वाद घेण्यासाठी येतात. गोव्यातील फिश फ्राय, प्रामुख्याने झसवण, कोळंबी, पापलेट फ्रायवर ताव मारणे, चिकन क्राफीयाल आदी पदार्थांचा मनमुरादपणे आनंद लुटण्यास अनेक खवय्यांना आवडते.

त्यामुळे मोठ्या प्रमाणात मासळीला मागणी वाढल्याने दरात देखील वाढ झाली आहे.