सांगे : बोरचेमळ-सांगे येथील मुख्य रस्त्यालगत असलेल्या रेखा आनंद नाईक यांच्या फळ भाजी विक्री करणाऱ्या गाड्याला बुधवारी रात्री पावणेदहाच्या दरम्यान अज्ञात इसमाने आग लावली. या आगीत रोख आठ हजार रुपये व एक लाखांपेक्षा अधिक रुपयांचे सामान जळाले आहे. या घटनेची सांगे पोलिस ठाण्यात अज्ञाताविरोधात रेखा नाईक यांनी तक्रार नोंदविली आहे. (Fire in Vegetable Shop in Sangem News Updates)

बुधवारी रात्री साडेनऊच्या सुमारास दुकान बंद करून रेखा नाईक सांगे बाजारात गेल्या होत्या. यावेळी पाळत ठेवून असलेल्या एका अज्ञात इसमाने केरोसीनचा वापर करून आपल्या दुकानाला आग लावल्याचे रेखा नाईक यांनी सांगितले. अवघ्या पंधरा मिनिटाच्या फरकाने ही आग लागल्याचे उघडकीस आले. कारण बाजारातून परत दुकानात येईपर्यंत चारी बाजूने आग लागली होती. यावेळी शेजारी व रस्त्यावरून जाणाऱ्यांनी आग विझवण्यासाठी धडपड केली; पण आतील प्लास्टिक साहित्याने पेट घेतल्याने आगीचा भडका उडाला, असे रेखा नाईक म्हणाल्या. कुडचडे अग्निशामक दलाने (Fire Brigade) घटनास्थळी धाव घेऊन आग विझवली. सांगे पोलिसांनी घटनेचा पंचनामा करून केरोसिनचा वापर केलेल्या बाटल्या जप्त केल्या आहेत.

गेल्या तीन-चार महिन्यांपासून रेखा नाईक यांनी गोवा (Goa) फलोत्पादन महामंडळाकडून भाजी विक्रीचा परवाना घेऊन दुकान सुरू केले होते. मोठ्या प्रमाणात गिऱ्हाईक नसले तरी पोटापाण्याचा व्यवसाय म्हणून दुकान सुरु होते. त्यात शुक्रवारी असलेल्या जत्रेसाठी भाजी आणली होती. ती या आगीत (Fire) भस्मसात झाली आहे. या आगीत आतील सामान, प्लास्टिक साहित्य, गाड्याचे साहित्य जळून खाक झाले.