कळंगुट : कळंगुट परिसरात पुन्हा एकदा अग्नितांडव पाहायला मिळालं आहे. रेस्टॉरंटला लागलेल्या भीषण आगीत शेजारील घरही जळून खाक झाल्याची घटना कळंगुटमध्ये घडली आहे. अग्निशमन दलाच्या जवानांनी तात्काळ घटनास्थळी धाव घेत आग नियंत्रणात आणली आहे. (Fire in Calangute News Updates)

खोब्रावाडा-कळंगुट (Calangute) येथे चार्लस्टन रोडवरील मीराबाई रेस्टॉरंटला गुरुवारी लागलेल्या आगीमुळे एका सिलिंडरचा स्फोट झाला. त्यामुळे आग आणखी भडकली. या दुर्घटनेत रेस्टॉरंटशेजारील कृष्णा दीपक परूळेकर यांच्या घराला आग (Fire) लागल्याने त्यांचेही मोठे नुकसान झाले आहे. पिळर्ण अग्निशमन दलाच्या कर्मचाऱ्यांनी तात्काळ घटनास्थळी धाव घेऊन आगीवर नियंत्रण मिळवले.

या दुर्घटनेत दोन भरलेले सिलिंडर अग्निशमन दलाच्या (Fire Brigade) कर्मचाऱ्यांनी सुरक्षित बाहेर काढले. सुदैवाने या दुर्घटनेत जीवितहानी टळली. मात्र, घर आणि रेस्टॉरंटचे मोठं नुकसान झालं आहे. किती नुकसान झाले, याची माहिती मिळू शकली नाही, मात्र अग्निशनम दलाच्या जवानांमुळे मोठा अनर्थ टळला. भरवस्तीत आग लागल्याने परिसरात काहीकाळ भीतीचं वातावरण होतं.