मोरजी: जुनसवाडा - मांद्रे येथील डोंगर माळरानावर आग लावून हजारो झाडांचे नुकसान केल्याची तक्रार स्थानिकांनी वन खाते आणि पोलिसांकडे केली आहे. आगीच्या या घटनेनंतर लगेच घटनास्थळी स्थानिक आमदार जीत आरोलकर यांनी भेट देऊन झाडांची पाहणी केली आणि संबंधित कंत्राटदाराविरुद्ध गुन्हा नोंदवण्याची सूचना पोलिसांना केली आहे.

जुनसवाडा - मांद्रे येथील किमान साडेसात लाख चौरस मीटर सरकारची जागा आहे. त्यापैकी तीन हजार चौरस मीटर जागेत वीज उपविभागीय कार्यालय होणार आहे. या जागेत एकूण शंभर कोटी रुपये खर्च करून मांद्रे मतदारसंघासाठी खास वीज केंद्र उभारण्यासाठी सरकारने मंजुरी दिली आहे. या व्यतिरिक्त इतरही सरकारची जागा होती, त्या जागेत ‘देवरूख’ या निसर्गप्रेमी संस्थेने एकूण सत्तर हजारहून अधिक झाडे लावली होती.

आज सकाळी साडेआठ वाजल्यापासून जी जागा सरकारने वीज उपविभागीय केंद्र उभारण्यासाठी दिली होती. त्या जागेची साफसफाई करण्यासाठी पणजी येथील एका खासगी कंपनीला कंत्राट दिले होते आणि त्या कंत्राटदाराच्या साईड इंजिनियरने या ठिकाणी सहा कामगारांना सांगून झाडे झुडपे छाटण्याचे काम सुरू केले होते. त्यानंतर दुपारी बारा वाजण्याच्या सुमारास मजुरांनी परिसरातील वाळलेल्या कुरणाला आग लावली आणि हा हा म्हणता पूर्ण डोंगर जळून खाक झाला. त्यातील ‘देवरूख’ या संस्थेने लावलेली हजारो झाडे जळून खाक झाली.

...आणि ‘देवरूख’ कार्यकर्ते ढसाढसा रडले

या डोंगरावर ‘देवरूख’ या पर्यारणप्रेमी संस्थेच्या कार्यकर्त्यांनी अतिशय कष्टाने सत्तर हजारहून अधिक झाडे लावली होती. ती या आगीत जळून खाक झाली. या घटनेची माहिती मिळताच ‘देवरूख’च्या कार्यकर्त्यांनी घटना येऊन पाहिली आणि त्यांना धक्काच बसला. आपण परिश्रमपूर्वक लावलेली झाडे बेचिराख झाल्याचे पाहून त्यांना दुःख अनावर होऊन ते ढसाढसा रडू लागले.