Fire News: गावकरवाडा-उसगाव येथील फॅन्सी स्टील इंडस्ट्रीजला शनिवार, 4 रोजी पहाटे 4 वाजण्याच्या सुमारास आग लागून 25 लाखांचे नुकसान झाले. शॉर्ट सर्किटमुळे आग लागली असावी, असा अंदाज व्यक्त करण्यात येत आहे. ही आग नियंत्रणात आणण्यासाठी अग्निशमन दलाचे चार बंब लागले.

उसगावात गावकरवाडा ते कल्लभवाडा या भागात शुक्रवारी वीजवाहिन्या दुरुस्तीचे काम रात्री उशिरापर्यंत सुरू होते. त्यामुळे या भागातील वीजपुरवठा खंडित केला होता. रात्री उशिरा या भागातील वीजपुरवठा सुरू करण्यात आला.

पहाटे 4 वाजण्याच्या सुमारास फॅन्सी स्टील इंडस्ट्रीजच्या वीजपुरवठा करणाऱ्या मुख्य स्वीच बोर्डकडे मोठा आवाज आला आणि लगेच या फॅक्टरीत धूर पसरला.

त्यामुळे फॅक्टरीतील कामगारांना जाग आली. त्यांनी पाहिले तेव्हा फॅक्टरीत आग लागली होती. त्यांनी आपल्या परीने आग शमविण्याचा प्रयत्न केला. इंडस्ट्रीजचे मालक मुकेश मालवीय यांना या दुर्घटनेची माहिती दिली.

नंतर 4.30 वाजता फोंडा अग्निशमन दलाला याची माहिती दिली. फोंडा येथून दोन आणि कुंडई अग्निशमन दलाचा एक बंब उसगावात दाखल झाला. आग आटोक्यात आणण्यासाठी जवानांनी बरेच परिश्रम घेतले.