Goa Fire News: काल (बुधवारी) दुपारी रवींद्र भवनामागील एका जुन्या बंद घराला आग लागल्याची घटना घडली. यानंतर मडगाव अग्निशमन दलाने घटनास्थळी धाव घेत आग विझवण्याचे काम केले.

तिथेच राहणाऱ्या रामनर्थ बढे यांच्याकडून माहिती मिळाल्यानंतर अग्निशमन दलाने घटनास्थळी पोहचून कामाला सुरुवात केली. यामध्ये फक्त बंद घराला आग लागल्याचे समजले.

मडगाव नगरपालिकेचे वॉर्ड नगरसेवक व्हिटोरिनो टावरेस यांनी प्रसारमाध्यमांना सांगितले की, रहिवासी हे गैरकृत्यांचे काम आहे की नाही हे सांगू शकत नाही, परंतु राज्यभरात वाढत्या आगीच्या घटना पाहता सरकारी यंत्रणांनी अधिक सतर्क राहणे आवश्यक आहे.

एका अग्निशमन अधिकाऱ्याने दिलेल्या माहितीनुसार, ती आग जुन्या घराला लागली असून आतमध्ये काही लाकडांचा साठा होता. काही वेळाच्या अथक प्रयत्नांनंतर ही आग आटोक्यात आली.

या बंद घराला आग नेमकी कशामुळे लागली याचे खरे कारण अद्याप कळू शकले नाही.

दरम्यान, महिन्याच्या सुरवातीला म्हादई अभयारण्यात लागलेल्या आगीचे पंचनामे सुरू आहेत. अशातच आज पुन्हा अभयारण्याच्या सुर्ला भागात आग लागल्याचे निदर्शनास आले. स्थानिकांनी ही बाब वन खात्याच्या लक्षात आणून दिल्यानंतर स्थानिकांच्या सहकार्याने खात्याने आग नियंत्रणात आणली.

पर्यावरणप्रेमी राजेंद्र केरकर म्हणाले, काही दिवसांपूर्वी लागलेल्या आगींमुळे म्हादई अभयारण्याचे मोठ्या प्रमाणात नुकसान झाले आहे. त्याचा येथील जैवविविधतेला मोठा फटका बसला आहे.