पणजी: प्रचारबंदी काळात व्हिडिओ शेअर केल्याप्रकरणी आम आदमी पार्टीचे सर्वेसर्वा अरविंद केजरीवाल यांच्याविरोधात एफआयआर दाखल करण्यात आला आहे. केजरीवाल यांनी कुडचडे मतदारसंघातील आपचे उमेदवार गॅब्रिएल फर्नांडिस यांचा प्रचार व्हिडिओ सोशल मीडियावर शेअर केला होता. लोकप्रतिनिधी कायद्याच्या कलमाखाली त्यांच्यावर गुन्हा दाखल करण्यात आला आहे.

प्रचारबंदी काळात उमेदवार किंवा राजकीय पक्षांना सक्रिय प्रचाराला परवानगी नसते. याकाळातच 13 फेब्रुवारी रोजी केजरीवाल यांनी व्हिडिओ (Video) शेअर केला. यासंबंधी 15 फेब्रुवारीच्या रात्री कुडचडे मतदारसंघाचे निवडणूक अधिकारी नीलेश धायगोडकर यांनी तक्रार दाखल केली होती, अशी माहिती पोलिसांनी (Police) दिली.

पोलिसांनी सांगितले की, केजरीवाल यांनी 13 फेब्रुवारी रोजी 'आप' गोव्याच्या इन्स्टाग्राम (Instagram) अकाउंटवर एक व्हिडिओ शेअर केला होता. यामध्ये ते कुडचडे मतदारसंघातील आपचे उमेदवार गॅब्रिएल फर्नांडिस यांचा प्रचार करत होते.