डिचोली: शिरगाव येथील खनिज डंप टाकून गावाला टेकून असलेले असुरक्षित आणि धोकादायक खाणखंदक बुजवावेत, अशी मागणी शिरगावच्या लोकांकडून करण्यात येत आहे.

राज्यातील विविध खाणींवरील १८ खनिज डंपचे ई-ऑक्शन करण्याचे खाण आणि भूगर्भ खात्याने निश्चित केले आहे. मात्र, गेल्या चार महिन्यांपासून ही प्रक्रिया रखडली आहे. गेल्या २२ जानेवारीपासून या प्रक्रियेला सुरुवात करण्याचे निश्चित करण्यात आले होते. १८० पैकी १२५ बोलिदारांनी तांत्रिकदृष्ट्या बोलीही सादर केली आहे.

खाण खात्याच्या या निर्णयानुसार शिरगाव येथील खनिज डंप हटविण्यात येणार असल्यास हाच डंप टाकून खाणखंदक बुजवावेत आणि शिरगावच्या जनतेची संभाव्य संकटातून मुक्तता करावी, अशी मागणी शिरगावचे माजी सरपंच बाबुसो गावकर आणि दीनानाथ गावकर यांनी चार महिन्यांपूर्वी केली होती. शिरगाव गावाला टेकून असलेल्या खाणखंदकाजवळच बांदेकर आणि पूर्वाश्रमीच्या चौगुले कंपनीचा प्रचंड डंप साठा पडून आहे. सध्या चौगुलेची खाण साळगावकर शिपिंग कंपनीने घेतली आहे.

गावाच्या हिताचा विचार करावा!

शिरगाव गावातील प्रसिद्ध श्री लईराई देवीच्या मंदिरापासून साधारण ४०० ते ५०० मीटर अंतरावर चौगुले कंपनीचे खाणखंदक आहे. या खाणखंदकाला जवळपास ५० वर्षे उलटून गेली आहेत. मात्र, आतापर्यंत या खाणखंदकापासून गावाला सुरक्षा मिळण्याच्यादृष्टीने कोणतीही उपाययोजना करण्यात आलेली नाही, की या खाणखंदकातील जलसाठ्याचे गावाच्या हितासाठी नियोजन करण्यात आलेले नाही.

गावाला टेकून कोमुनिदाद जागेत असलेले हे खाणखंदक दिवसेंदिवस धोकादायक बनत आहे. पावसाळ्यात तर खाणखंदकातील पाण्याबरोबर खाणीवरील गाळमिश्रित माती जवळपासच्या शेतीत घुसत आहे. जोरदार पर्जन्यवृष्टी झाली, तर हे खाणखंदक ‘ओव्हरफ्लो’ होते. हे खाणखंदक बुजविण्याच्यादृष्टीने वेळीच उपाययोजना केली नाही, तर भविष्यात गावावर मोठी आपत्ती ओढवण्याची शक्यता नाकारता येत नाही, अशी भीती दीनानाथ गावकर, बाबुसो गावकर आणि अन्य नागरिकांनी व्यक्त केली.