डिचोली - पूरग्रस्त साळ (Sal) गावात निर्माण झालेल्या अस्वच्छतेमुळे डासांची (mosquitoes) पैदास वाढली असून, आता रोगराई (Disease) फैलावण्याचा धोका आहे. या पार्श्वभूमीवर आरोग्य खात्याने आता साळ गावात प्रतिबंधात्मक उपाययोजना हाती घेतल्या आहेत. डिचोली (Bicholim) सामाजिक आरोग्य केंद्रातर्फे (Health Centre) सोमवारी साळ गावात फॉगिंग आणि जंतूनाशक औषध फवारणी करण्यात आली. (Fear of spreading disease in flooded village)

आरोग्य केंद्राच्या कर्मचाऱ्यांनी घरोघरी 'ओआरएस' पाकिटे आणि गोळ्यांचे वाटप केले. सामाजिक आरोग्य केंद्राची आरोग्य अधिकारी डॉ. मेधा साळकर यांच्या मार्गदर्शनाखाली ही उपाययोजना राबविण्यात आली. या आरोग्य केंद्राच्या सिस्टर प्रतिमा, शिवाजी तसेच रामा, सज्जन आदी कर्मचाऱ्यांनी या मोहिमेत सहकार्य केले.

यावेळी स्थानिक सरपंच घनश्याम राऊत आणि अन्य पंच उपस्थित होते. पुरामुळे पुढील काही दिवसात विशेष करून लहान मुलांमध्ये ताप, संडास यासारखे आजार फैलावण्याची शक्यता आहे. मलेरिया, डेंग्यूचाही फैलाव होण्याची भिती आहे. तेव्हा साळमधील जनतेने काळजी घ्यावी. ताप आदी आजाराची लक्षणे आढळून आल्यास आरोग्य केंद्राशी संपर्क साधून सहकार्य करावे. असे आवाहन डॉ. मेधा साळकर यांनी साळवासियांना केले आहे.