पणजी: अन्न व औषध प्रशासनाच्या (एफडीए) तपासणी पथकाने तीन बेकरी व मिठाई उत्पादन करणाऱ्या युनिट्सची तपासणी केली. दरम्यान, एका युनिटमध्ये अत्यंत गलिच्छ आणि अस्वच्छ परिस्थितीत उत्पादन सुरू असल्याचे निदर्शनास आले.

गावसावाड-म्हापसा येथील गणेश बेकरीत अस्वच्छ परिस्थितीत उत्पादन सुरू असल्याचे आढळल्याने पथकाने तत्काळ उत्पादन थांबवण्याचे आदेश दिले तसेच त्यांच्या किरकोळ विक्री केंद्राला अन्न सुरक्षा कायदा २००६ च्या कलम ६९ अंतर्गत १०,००० रुपये दंड ठोठावला. या पथकात रिचर्ड नोरोन्हा, अमित मांद्रेकर आणि लेनिन डिसा यांचा समावेश होता.

तपासणीदरम्यान मोयरा येथील जे.जे. बेकरीमध्ये स्वच्छतेचे निकष पाळले जात असल्याचे आढळले. श्री गणेश रंका फूड्स येथे किरकोळ स्वरूपाचे गैरपालन आढळल्याने सुधारणा नोटीस बजावण्यात आली.

तर म्हापसा येथे गणेश बेकरीत अत्यंत अस्वच्छ उत्पादन परिस्थितीमुळे या युनिटवर कारवाई करून ते तत्काळ बंद करण्यात आले, तसेच १० हजार रुपये दंड आकारण्यात आला.