Sport Ground :

सासष्टी, पालिकेच्या प्रभाग ९ मधील बोर्डा येथे पुढील सहा महिन्याच्या आत अद्ययावत फुटसाल मैदान साकारणार आहे. या मैदानाच्या कामाचा शुभारंभ आज फातोर्डेचे आमदार विजय सरदेसाई यांच्या उपस्थितीत करण्यात आला.

यावेळी सरदेसाई यांनी सांगितले की, फातोर्डातील सार्वजनिक खुल्या जागांचा योग्य प्रकारे वापर करण्याचा आमचा उद्देश आहे. फुटसाल हा सध्या युवकांचा आवडता खेळ असून तो सर्वांना एकत्र आणतो. शिवाय फुटबॉल गोमंतकीयांच्या रक्तात आहे.

काही लोकांना इथे बाग हवी आहे, पण मडगाव व फातोर्डात ज्या बागा आहेत त्यांची देखभाल होत नाही हे आम्ही पाहतो. इथे फुटसाल मैदानाबरोबरच वॉकिंग ट्रॅकची देखील व्यवस्था केली जाईल.

आता इथे फुटसाल मैदानासाठी काही लोकांचा विरोध असेल, पण सहा महिन्यांनंतर याच लोकांना हा परिसर आवडू लागेल असेही सरदेसाई यांनी सांगितले. फुटसाल मैदानाची देखभाल व्ही फॉर फातोर्डातर्फे केली जाईल. असे सरदेसाई यांनी जाहीर केले.

हे मैदान होऊ नये म्हणून मडगावचे आमदार दिगंबर कामत यांनी बरेच प्रयत्न केल्याचे सरदेसाई यांनी सांगितले. मात्र आम्ही हा विषय हातातून निसटून जाऊ दिला नाही, असे ते म्हणाले.

४९ लाख रुपये खर्च

येथील नगरसेवक रवींद्र (राजू) नाईक यांनी सांगितले की, ही एकूण १५०० चौरस मिटर जागा असून फुटसाल मैदान ६०० चौरस मीटर जागेत होईल. त्यासाठी ४९ लाख रुपये खर्च होईल. गोवा जेव्हा मुक्तीची ६० वर्षे साजरा करीत होता तेव्हा सरकारने फातोर्डा व मडगावसाठी एक कोटी रुपये मंजूर केले होते.

तेव्हा दोन्ही ठिकाणी फुटसाल मैदान बांधण्याचा निर्णय घेण्यात आला होता. आपण ही जागेत फुटसाल मैदान तयार करण्यासाठी आनंद तिंबलो कुटुंबीयांकडून ना हरकत दाखला घेतला आहे.

नगरपालिकेतही या संदर्भात ठराव मंजूर झाला आहे, असे त्यांनी सांगितले. हे काम जीसुडामार्फत करण्यात येत असून राऊल रॉड्रिग्स हे कंत्राटदार आहेत, अशी माहिती त्यांनी दिली. यावेळी गोवा फॉरवर्डचे नगरसेवक उपस्थित होते.