गोव्यातील एका अग्रगण्‍य अशा औषध निर्मिती प्रकल्‍पाच्‍या नोकर भरतीसाठी भोईसर-महाराष्‍ट्र येथे मुलाखती ठेवल्‍याने गोवा फॉरवर्डचे अध्‍यक्ष विजय सरदेसाई यांनी त्‍याला आक्षेप घेत गोव्यातील युवकांना राेजगारांपासून परालंबित करण्‍याचे हे कारस्‍थान असा आरोप केला आहे. ही नोकरभरती तत्‍काळ थांबवावी अशी मागणी करणारे पत्र त्‍यांनी गोवा राज्‍याच्‍या मुख्‍य सचिवांना पाठविले आहे.
गोव्यातील उद्याेगात 80 टक्‍के गोमंतकीयांना रोजगार देण्‍याच्‍या तत्‍वाच्‍या विरोधात या कारखान्‍याची ही कृती असल्‍याचे सरदेसाई यांनी म्‍हटले आहे.
गोव्यातील तरुणांचे हितसंबंध राखण्‍यासाठी गोव्यातील उद्योगात या तरुणांना 80 टक्‍के रोजगार मिळणे आवश्यक असून यासाठी उद्योगावर सक्‍ती करावी अशा आशयाचे एक विधेयक विधानसभेत आणले होते.
हे विधेयक सध्‍या प्रलंबित आहे. हे विधेयक अंमलात आणून त्‍याची त्‍वरित अंमलबजावणी करण्‍याची गरज सरदेसाई यांनी व्‍यक्‍त केली.
गाेव्‍यातील तरुणांच्‍या हक्‍काच्‍या असलेल्‍या नोकर्‍या राज्‍याबाहेरील लाेकांना देणे हा गोवेकरांवर केलेला अन्‍याय आहेच त्‍याशिवाय गोवेकरांचा हा अपमानही आहे असे त्‍यांनी म्‍हटले आहे.
गोमंतकीयांना खासगी उद्याेगातील नोकर्‍यात 80 टक्‍के आरक्षण मिळावे यासाठी गोवा फॉरवर्ड मागची कित्‍येक वर्षे मागणी करत आहे. यासंदर्भात वेळोवेळी विधानसभेतही आवाज उठविला आहे.
खासगी उद्योगांना गोमंतकीय युवकांना नोकर्‍या न देण्‍यापासून रोखण्‍यास सरकारला अपयश आले आहे. गोव्यातील युवकांना रोजगारात प्राधान्य देणारी धोरणे सरकारने लागू केली पाहिजेत. तसेच या युवकांना पुरेसे कौशल्य प्रशिक्षण देणे आवश्यक आहे.
मात्र या बाबतीत सरकारला पूर्णत: अपयश आल्‍याचे त्‍यांनी आपल्‍या पत्रात म्‍हटले आहे.
गाेव्‍यात कार्यरत असलेल्‍या कंपन्या स्‍थानिकांना कामावर घेतात की नाही याची खात्री सरकारने केली पाहिजे. आणि जर तसे होत नसेल तर अशा कंपन्‍यांवर कठोर कारवाई करण्‍याची गरज असल्‍याचे त्‍यांनी म्‍हटले आहे. तसे न केल्‍यास गोव्यातील तरुण रोजगारापासून अलिप्‍त रहातील याकडे त्‍यांनी लक्ष वेधले आहे.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.