मोरजी: कोरगाव येथे धोकादायक झाडे कापण्यासाठी गेलेल्या सरकारी यंत्रणेच्या कामात व्यत्यय आणून स्थानिक महिला पंचसदस्याचा विनयभंग केल्याप्रकरणी पेडणे पोलिस स्थानकात उदय प्रभुदेसाई आणि त्यांचा मुलगा उगम प्रभुदेसाई यांच्या विरोधात तक्रार नोंदविली आहे.

यावेळी पत्रकारांशी बोलताना पीडित पंच महिलेने सांगितले की, भाईड-कोरगाव येथील वयस्कर महिला चंपावती धारगळकर यांच्या घरावर असलेले झाड धोकादायक स्थितीत होते. हे झाड कापण्यासाठी या महिलेने कोरगाव पंचायतीकडे अर्ज केला होता. त्यानुसार पंचायतीने आपत्कालीन व्यवस्थापनाअंतर्गत त्याची माहिती पेडणे उपजिल्हाधिकारी कार्यालयाला दिली होती.

उपजिल्हाधिकारी कार्यालयाने हे झाड कापण्याचे आदेश दिले होते. त्यानुसार पोलिस संरक्षणात हे झाड कापण्यासाठी शुक्रवारी सकाळी सरकारी यंत्रणा गेली असता तेथे उदय प्रभुदेसाई आणि त्यांचा मुलगा उगम यांनी झाड कापणाऱ्या व्यक्तींना अडथळा आणला. तसेच झाड कापण्यासाठी मज्जाव केला.

त्यावेळी स्थानिक पंचांनी पोलिसांनी बोलावून घेतले. त्यावेळी तिच्याशी हुज्जत घालून तिचा व्हिडिओ आणि फोटो काढण्याचे काम उदय प्रभुदेसाई यांनी केले. तसेच तिचा हात ओढून विनयभंग केल्याची तक्रार पेडणे पोलिस स्थानकात नोंदविली आहे.