Farmagudi Hit And Run Case: फोंड्यात एक 'हिट अँड रन'चा प्रकार समोर आला आहे. फर्मागुडी येथील गोवा अभियांत्रिकी महाविद्यालयाच्या परिसरात एका अज्ञात वाहनाची धडक बसून एनआयटीची विद्यार्थीनी प्रीती शर्मा (28, हरियाणा) हिच्या डोक्याला मार लागून ती जखमी झाल्याची घटना काल (12 जून) घडली आहे. याबाबतची महत्वाची माहिती समोर आली आहे.

विद्यार्थिनीला धडक मारून घटनास्थळावरून पळ काढलेल्या वाहनचालकाने आपला गुन्हा कबूल केला आहे. अक्षय टिळक (21, खांडेपार) असे वाहनचालकाचे नाव असून तो फोंडा पोलिसांना शरण आला आहे. यासंदर्भात फोंडा पोलीस अधिक तपास करत आहेत.

काल एनआयटी विद्यार्थीनी प्रीती शर्मा रस्त्याने जात असताना अक्षय टिळक याने भरधाव वेगात येऊन तिला धडक दिली होती. यामध्ये प्रीती जखमी झाली असून तिच्यावर फोंडा उपजिल्हा रुग्णालयात उपचार सुरू आहेत.

दरम्यान, आजही अशीच एक घटना गिरीत घडली आहे. रस्ता ओलांडत असताना भरधाव कारने 53 वर्षीय सिक्युरिटी गार्डला जोरदार धडक दिली. यामध्ये अनिल कांता सिंग हे जबर जखमी झाले असून त्यांना रुग्णालयात नेत असताना त्यांचा मृत्यू झाला. याप्रकरणी म्हापसा पोलिसांनी कारचालक रमेश प्रेमचंद बरड याला ताब्यात घेतले आहे.