Fake Cashew in Goa : बाजारात बनावट काजू आणि सुका मेवा विकला जात असल्याची तक्रार काहींनी केली होती. यावर वजन आणि माप खात्याने तिसवाडी, बार्देश व सासष्टी तालुक्यात सुकामेवा विकणाऱ्या 12 मिठाईच्या दुकानांवर छापे टाकून 10 लाखांचा माल जप्त केला. खात्याच्या 3 वेगवेगळे पथक दिवसभर कामाला लागले होते. ही कारवाई पुढील आठवड्यातही सुरूच राहिल, असे दक्षिण गोवा सहाय्यक नियंत्रक नितीन पुरुषन यांनी सांगितले.

बार्देश तालुक्यात सहा ठिकाणी कारवाई करत काजुची 389 पाकिटे, मनुकाची 48, बदाम 118, मसाला 20, चॉकलेटची 134 पाकिटे जप्त केलेत. सासष्टीत 5 दुकानांवर कारवाई करुन प्रत्येकी अर्धा किलो काजुची 396 पाकिटे, मनुका 71, बदाम 55, मसाला 118, चॉकलेटची 361 पाकिटे तर पणजीत एका दुकानातून काजुची 285 पाकिटे जप्त करण्यात आली.

ग्राहकांनी जागरूक राहावे

ग्राहकांनी मिठाई व सुकामेवा विकत घेताना काळजी घ्यायला हवी. भेसळ व बनावट मिठाई बाजारात विक्रीस येऊ शकते. पाकिटावर दर, पदार्थ केव्हा, कुठे तयार झाला व वजन तपासून घ्यावे. ग्राहकांनीच जागृत राहावे. तर विक्रेत्यांनी कारवाई टाळण्यासाठी दुकानात माल ठेवताना काळजी घ्यावी, असे असे आवाहन वजन माप खात्याचे सहाय्यक नियात्रक नितीन पुरुषन यांनी केले आहे.