मोरजी: आगरवाडा - मांद्रे दरम्यान बोडको धेनु डोंगरावर सोमवार सायंकाळी 4.30 च्या दरम्यान कानठळ्या बसवणारा स्फोट झाल्याने आगरवाडा गावातील लोकांची एकच धावपळ उडाली. येथील डोंगरावर खडक फोडण्यासाठी जिलेटीनचा वापर करण्यात येत असून त्यामुळे हे बॉम्बसदृश्य स्फोट घडवून आणले जात असल्याचे येथील ग्रामस्थांचे म्हणणे आहे. त्यामुळे बेकायदेशीरपणे जिलेटीन स्फोट (Gelatin blast) घडवून आणणाऱ्यांवर कारवाई करावी, अशी मागणी स्थानिक लोकांकडून करण्यात येत आहे. (Explosion of gelatin in Agarwada)

याबाबत आगरवाडा (Agarwada) - चोपडेचे सरपंच भगिरथ गावकर यांना विचारले असता त्यांनी या वृत्ताला दुजोरा दिला. आपल्यालाही सोमवारी सायंकाळी 4.30 च्या सुमारास डोंगर माथ्यावर स्फोट झाल्याचा आवाज आला. मात्र, तो स्फोट (Explosion) नक्की कसला हे कळू शकले नाही. आगरवाडा डोंगर माथ्यावर खडक फोडण्यासाठी जिलेटीनचा वापर होत असल्याच्या तक्रारी आहेत. पंचायतीतर्फे याची शहानिशा करून कारवाई करण्यात येईल. लोकांनी याबाबत पंचायतीला सहकार्य करावे, असेही ते म्हणाले.

निवडणूक (Goa Assembly Election) रणधुमाळीत अशाप्रकारे गैरफायदा घेवून दिवसाढवळ्या जिलेटीन स्फोट होत असल्याबद्दल नागरिकांकडून तीव्र संताप व्यक्त करण्यात येत आहे. असे प्रकार बंद न झाल्यास जिल्हाधिकारी कार्यालयावर धडक मोर्चा नेण्याचे स्थानिक नागरिकांनी ठरवले आहे.